Qyzylordada Syrdarııa boıyndaǵy sý tasqynynan qaýipti aımaqtar anyqtalyp, daıarlyq máseleleri kúsheıtildi.
Oblys basshysy Qyrymbek Kósherbaev ótkizgen alqaly jıynda sý tasqynynan shyǵynsyz ótý jaıy talqylandy.
Oblystyq jumyldyrý daıyndyǵy basqarmasynyń basshysy Asylbek Shámenov Syrdarııa boıynda 56 yqtımal qaýipti aımaq anyqtalǵandyǵyn aıtty. Olarǵa 109 jaýapty mekeme bekitilip, otyn men shyǵyn materıaldary satyp alynǵan. 79 evakýasııalyq jáne 99 qabyldaý pýnkti, sondaı-aq, 2 «Qazavıaqutqarý» tikushaǵy qyzmet kórsetýge daıyn.
- Bógetter men qorǵanys bekinisteriniń jaǵdaıyn zertteý barysynda 37 nysan anyqtaldy. Onyń ishinde 25-i birinshi kezekte jóndeýdi qajet etedi. Qazaly aýdanynda 18 nysan jóndeýden ótti, qalǵany boıynsha jumys júrgizilýde, - dedi basqarma basshysy.
Oblystyq TJ departamenti bastyǵynyń mindetin atqarýshy Asqar Tóleshov qys mezgilinde óńirde 232 adam men 32 arnaıy tehnıka jumyldyrylyp, 13 jylytý pýnkti men radıo jáne telefonmen jabdyqtalǵan 3 medısınalyq-qutqarý pýnkti jumys isteıtindigin baıandady.
Oblys ákimi jaýapty tulǵalarǵa Syrdarııa ózenine táýlik boıy monıtorıng júrgizip, jeke quramdy turaqty daıyndyqta ustaýdy buıyrdy. Oblystyq jáne respýblıkalyq mańyzy bar joldarda qatty sýyqta jol-kólik qatynastaryn toqtatýdy tapsyrdy.
Baqtııar TAIJAN,
«Egemen Qazaqstan»
Qyzylorda oblysy