Dúnıe dıdary sát saıyn qubylyp, kerenaý álemniń qas-qabaǵy birde ashyq, birde túsińki. Adamzat jaratylysynyń ishki áleminde búgin pende balasy uǵyp-túsinip bolmaıtyn keraǵar qubylystar paıda bolǵan. Keshe aq degeniń – búgin qara, búgin aq degeniń – erteń qara... Osynaý aýmaly-tókpeli kezeńde táýelsizdik alyp, birazǵa deıin bireý bilip, bireý bilmegen jas el – Qazaqstan búgingi kúnde aq mańdaıy jarqyraǵan memleket.
Álemdik saıasattyń qaqyraıma sahnasynda qatar-qatar jaıǵasqan prezıdentterdiń qaq ortasynda únemi Elbasy Nursultan Nazarbaev otyrady. О́tken men keler kúndi salmaqty baǵamdap, aınalasyndaǵy bar jaıtty oısha tarazylap, sergek qadaǵalaıdy. Al Astana tórinde tórtkúl dúnıe memleketteri basshylarynyń basyn qosqan talaı jıyn ótken. Álemdik jáne dástúrli dinder kóshbasshylarynyń basqosýy alty ret uıymdastyryldy. Sırııa daǵdarysyn retteýge arnalǵan Astana prosesi kelisim men beıbitshiliktiń beıtarap alańy boldy. Jyl saıyn Astanada ótetin halyqaralyq saıası, qarjylyq, ekonomıkalyq forýmdar men sımpozıýmdarda álemniń mańyzdy máseleleri úzbeı talqylanady. Halyqaralyq EKSPO kórmesi de aldymen elimizdiń mereıin ósirgen, Astanamyzdyń alapasyn asyrǵan aıtýly shara boldy. Osynyń bárin álemdik, eldik pikir Nursultan Nazarbaevtyń esimimen baılanystyrady. Al babadan qalǵan baıtaq dalamyzdyń júregi – Astana osy oqıǵalardyń baǵanaly ordasy.
Mádenıet jáne sport mınıstrliginiń qoldaýymen Q.Qojamııarov atyndaǵy Memlekettik akademııalyq uıǵyr mýzykalyq komedııa teatry Astana qalasynyń 20 jyldyq mereıtoıy aıasynda kórermender nazaryna usynǵan Nursultan Nazarbaevtyń «Qazaqstan joly» kitaby boıynsha jazylǵan «Astana» pýblısıstıkalyq dramasy osynaý oqıǵalardyń ózegi bolǵan tarıhı kezeńdi qamtıdy. Osylaısha Elbasynyń kórkem beınesi tuńǵysh ret teatr sahnasynda qoıyldy.
Qoıylymnyń ıdeıa avtory jáne qoıýshy rejısseri – halyq ártisi Murat Ahmadıev. Prezıdent kitaby boıynsha ınssenırovkasyn jazǵan – jazýshy Ahmetjan Ashırı. Mýzykamen árlegen – Karım Gazıev. Bas keıipker – Elbasy rólin Mádenıet qaıratkeri Azızjan Iskanderov somdady. Elbasy Nursultan Nazarbaevtyń astanany Arqa tósine kóshirýdegi saıası qadamy, mańyzdy róli kórsetilgen qoıylymnyń tusaýkeseri Beıbitshilik jáne kelisim saraıynda ótti.
Nursultan Ábishuly Nazarbaevtyń saıası erik-jigeriniń arqasynda Uly Daladaǵy myńjyldyqtar toǵysynda 20 jyl ishinde jańa Qazaqstandy beıneleıtin tamasha qala salyndy. Astanany kóshirý bastamasy birden qoldaý tappasa da, Elbasynyń tabandylyǵynyń arqasynda eshbir kedergige, kúdikterge qaramastan, Arqa tósinde ásem shahar boı kóterdi. Jas astananyń jetistigine degen senim Qazaqstan halqynyń qoldaýyna ıe boldy, jaýapty saıası sheshim óz maqsatyna jetti. Búginde «Elbasy. Táýelsizdik. Astana» uǵymdary bir-birimen qabysyp ketti. Astana – Qazaqstandy jańǵyrtýdyń, onyń jetistikteri men alǵa jyljýynyń basty nyshany, álemdegi beıbitshilik pen kelisimniń baǵanaly, basty ordasy. Jastardyń, bolashaqtyń qalasy.
Qoıylym Elbasy sanasynda astanany Arqaǵa kóshirý ıdeıasynyń shyraǵy tutanǵan sátten bastap, sol ıdeıanyń júzege asqanǵa deıingi ýaqyt aralyǵyn qamtıdy. Monolog arqyly kórermenmen dıalog ornatqan keıipker jan júregin tolqytqan, kóńiline tynyshtyq bermegen oılardy tebirenispen aıtady. Qaz-qaz basqan jas memlekettiń aldynda turǵan qyrýar istiń qııýyn taýyp, tyǵyryqtan shyǵar jol izdegen Elbasynyń kórkem beınesi bitim jasaýda, sheshim qabyldaýda, kelissóz júrgizýde barynsha ashyla túsedi.
«Astanany Almatydan Aqmolaǵa kóshirýde kóp qıyndyq kezdesken. Áý basynda qarsylyq kóp bolǵan. Barlyǵy senbegen. Oǵan biz osy oqıǵanyń astaryna úńilý barysynda kóz jetkizdik. Sony zerttep, 1994 jyldyń 6 maýsymy men 6 shildesi aralyǵynda bolǵan saıası oqıǵalardy negiz etip aldyq. Sol kezdegi qarsylyq pen qoldaýdyń bárin qoıylymda ashyp kórsetýge tyrystyq. Basty rólde bir adam. Ol – Prezıdenttiń róli. Qalǵandary − jazýshylar, aktrısalar, stýdentter men depýtattar. Bul qoıylym ásem shahar Astananyń 20 jyldyǵyna arnalady», dedi Q.Qojamııarov atyndaǵy Memlekettik akademııalyq uıǵyr mýzykalyq komedııa teatrynyń kórkemdik jetekshisi Murat Ahmadıev.
Al Elbasy kitaby arqyly pýblısıstıkalyq pesa jazǵan dramatýrg Ahmetjan Ashırı: «Elbasynyń «Astana – Eýrazııa júreginde», «Uly Dala ulaǵattary», «Táýelsizdik belesteri», «Qazaqstan joly» sııaqty kóptegen kitaptary bar. Bárin oqyp, tanystyq. Elordany Arqa tórine ornalastyrýdaǵy mańyzdy qadamy osy pesaǵa ózek boldy. Elbasynyń ıdeıasy, ony halyqtyń, zııaly qaýymnyń talqysyna salyp, báriniń pikirin tyńdap, jeti ret ólshep, bir ret kesken kóregendigi bizdiń de shabytymyzdy oıatty. Táýelsizdiktiń eleń-alań shaǵynda, ekonomıkalyq turaqtylyqty oılap, halyq turmys-tirshiligimen ábiger bop júrgen shaqta osynaý sheshim qalaı bolar eken degen kúdik-tumandy seıiltý úshin Elbasy qanshama jumys istedi. Sandaǵan kezdesý ótkizip, ishki-syrtqy saıası turaqtylyqty qamtamasyz etti. Bul qoıylym Nursultan Ábishulynyń bitimger, bastamashyl beınesin ashýǵa talpynǵan týyndy. Onyń baǵasyn qurmetti halyq bere jatar», dedi.
Qoıylymnan Elbasynyń jedel, ótkir sheshim qabyldaı alatyn qasıeti, beıbit sózge, bitimge jaqyn bolmysy erekshe kórinedi. Memleket basshysynyń halyqaralyq deńgeıdegi qaıratkerlik tulǵasyn, saıasat sardary beınesin akter Azızjan Iskanderov senimdi somdaıdy. Monolog arqyly akter-Elbasy kórermenin-halqyn aıtqanyna sendire biledi. Al jańa elorda Astananyń álem aldyndaǵy shyraıly kelbeti, mańyzdy orny menmundalaıdy. Bul qoıylym Astanamyzdyń 20 jyldyǵyna tartylǵan syılyqtardyń ishindegi súbelileriniń biri boldy dep oılaımyz.
Baǵashar TURSYNBAIULY,
«Egemen Qazaqstan»