Fızıkalyq qurylymy men tehnologııalyq turǵydan kitapty jetildirý qıyn. Osydan eki myń jyl buryn qaǵazǵa jaza bastaǵannan beri kitaptyń formasy ózgergen joq.
Nıý-Iorktiń jas oqyrmandaryna arnalǵan Dutton Books baspasynyń prezıdenti Djýlı Stross-Gabeldiń kishkentaı kitaptardy oılap tabýy baspa ındýstrııasyna jańa lep ákeldi. Qalta kólemimen birdeı kishkentaı kitapshalar Gollandııada keńinen tanyla bastady.
«Alǵash kórgenimde tańǵaldym, deıdi avtordyń ózi. – Olardy qalaı jasaıtynyn anyqtaýdy ózime mindet ettim».
О́tken aıda Dutton kishkentaı kitapshalarynyń satylymyn bastady. Jastar men eresekterdiń súıikti avtoryna aınalǵan Djon Grınniń kitabyn qaıta basyp shyǵardy. Kishkentaı kitaptar qalta telefonynyń kólemindeı jáne qalyńdyǵy basbarmaǵyńyzben shamalas. Al paraqtarynyń qalyńdyǵy pııaz qabyǵynan da juqa. Olardy bir qolmen oqý da yńǵaıly, óıtkeni tekst kóldeneń túsirilgen. Paraqtaryn aýdarý smartfon betin túrtkennen ońaı.
Bul joba sátti bolsa, jasalǵan jumystar kitap baspasy ındýstrııasyn damytyp, tipti kitap oqý mádenıetine jańalyq engizbek.
Mıster Grın kishkentaı kitaptarmen Amsterdamda turǵan kezinde tanysqan-dy. Nıderlandtar óz tilinde olardy «dwarsliggers» dep ataıdy. Jańa format Eýropada keń taralyp, onyń 10 mıllıonǵa jýyq tırajy satylǵan. Erekshe formatta Den Braýn, Djon le Karre, Ian Mak Evan, Izabel Allandtyń, sonymen qatar Agata Krıstı men Fıtz Skot Fıtzdjerald syndy klassıkterdiń shyǵarmalary jaryq kórdi.
Djon Grınniń «Alıaskany izdeımin», «Birneshe Katerına», «Qaǵaz qalalar», «Juldyzdarymyzdyń qatesi» týyndy-
lary kishkentaı kitap retinde 12 dollardan, al jınaǵy 48 dollardan satylmaq. Olardy Amerıkanyń kitap dúkenderinen ońaı tabýǵa bolady.
Ǵasyrlar óte baspa úıleri kishkentaı kitaptarmen túrli tájirıbe jasap, keı kezde jaqsy nátıjege jetip otyrdy. 1939 jyly Pocket Books Amerıkaǵa qalta kólemindeı kitaptardy tanystyrǵan bolatyn. Ekinshi dúnıejúzilik soǵys kezinde amerıka áskerin kitappen qamtamasyz etý jańa bastamaǵa ákeldi. Áskerı qyzmetkerler ózderimen alyp júretin kitaptar shyǵaryla bastady.
Degenmen sońǵy kezde kitap ındýstrııasyndaǵy jańalyqtar tek sıfrlandyrýǵa baılanysty. Buǵan elektrondy kitap pen aýdıo kitaptardy mysal retinde aıta alamyz.
Keı baspa úıleri buǵan deıin jaryq kórgen kitaptardyń muqabasyn ózgertý arqyly olardyń satylýyn qaıta jandandyrǵysy keldi.
Mıster Grınniń aǵylshyn tilindegi kóldeneń kitaptaryn tabý qıynǵa soqty. Gollandııalyq baspa úıi Royal Jongbloed buǵan qol jetkizgen jalǵyz kompanııa. Olardyń kitaptary Fınlıandııa zaýyty daıarlaıtyn óte juqa biraq myqty qaǵazdardan jasalǵan. Munymen qosa Dutton dızaınerleri qaripter men mátindi ornalastyrý boıynsha tájirıbeler jasaǵan.
«Biz ár mıllımetrdiń suraýy bar zamanda ómir súrip jatyrmyz», deıdi mıss Stross-Gabel.
Maqalany aýdarǵan Svetlana Ǵalymjanqyzy,
«Egemen Qazaqstan»