Kún saıyn qaladaǵy qoqys jáshikterine tastalǵan kitaptardy kórý atyraýlyq tarıhshy Vıacheslav Afanasevqa aýyr tıetin. Bir kúni belgili mesenat, «Bylına» orys etnomádenı birlestiginiń tóraǵasy Andreı Korablevqa «Osy kitaptardyń bárin bir jerge jınaý múmkin bolsa» degen oıyn aıtady. Ideıany kásipker de qoldaı ketti, sonyń nátıjesinde Atyraýda alǵash ret halyqtyq kitaphana ashyldy.
Oblys ortalyǵyndaǵy «Kolızeı» JShS ǵımaratynan oryn alǵan kitaphanaǵa qazirdiń ózinde alty myńnan astam kitap jınalǵan.
– Memleket basshysynyń «Bolashaqqa baǵdar: rýhanı jańǵyrý» baǵdarlamalyq maqalasyn júzege asyrý baǵytynda oblysta birqatar sharalar atqarylyp jatyr. Qoǵamdyq kitaphananyń ashylýyn da osy baǵdarlamamen baılanystyrýǵa bolady. Munda kez kelgen adam kelip, kitap oqýyna jáne syılaýyna múmkindik bar. Men de kitaphanaǵa kórimdik retinde biraz kitaptar ákeldim, – deıdi Atyraý oblysy boıynsha QHA tóraǵasynyń orynbasary-Hatshylyq basshysy Gúlmıra Shákirova.
Qoǵamdyq kitaphanadan san túrli saladaǵy ádebıetterdi, kórkem ádebıetti tabýǵa bolady. Tipti munda sırek kezdesetin kitaptar da bar. «Bylına» orys etnomádenı birlestigi aldaǵy ýaqytta kitaphana janynan ashyq pikirtalas alańyn qurýdy josparlap otyr.
Baqytgúl BABASh,
«Egemen Qazaqstan»
ATYRAÝ