Qostanaılyqtar qýanyshy janynda kúzdiń yqtasyn izdeter qara sýyǵynyń yzǵary da bilinbegen tárizdi. Ortalyq stadıonda «Tobyl» Soltústik Qazaqstan oblysynyń «Qyzyljar» komandasymen bıylǵy sońǵy kezdesýin ótkizip, 3:0 esebimen utty.
«Tobyl» «Qyzyljardy» osylaı oısyrata jeńip, stadıonda qara sýyqqa qarsy qarap, oıynnyń ár sátin baǵyp otyrǵan jankúıerlerin qýanyshpen jylytyp jibergendeı boldy. Biraq «Tobyl» jankúıerleriniń basty qýanyshy bul emes edi. Komanda bıyl el chempıonatynda úshinshi oryndy jeńip aldy. Bul «Tobyl» komandasynyń 8 jyldan keıingi shyǵyp otyrǵan bıigi bolatyn. Osyǵan oraı Qostanaı qalasyndaǵy E.О́mirzaqov atyndaǵy oblystyq fılarmonııada komandaǵa qurmet kórsetildi.
Qazaqstan fýtbolynyń ańyzy, Seıilda Baıshaqov «Tobyl» komandasynyń múshelerine, basshylaryna, qyzmetkerlerine qola medal tapsyrdy. Fýtbol sportynyń mereıli sátine arnalǵan saltanatta oblys ákimi Arhımed Muhambetov fýtbolshylar men jankúıerlerdi bıylǵy tabysymen quttyqtady.
– Qazaqstan chempıonatyndaǵy tabysymyz úlken eńbektiń arqasynda múmkin boldy. Aldymen fýtbolshylarǵa, barlyq bapkerlerge rahmet aıtamyn. Ákimshilik tarapynan da fýtbolǵa jasap otyrǵan jaǵdaıdy jankúıerler kórip otyr. Osydan birneshe jyl buryn stadıon kútimsiz, standartqa saı kelmeıtin. Biz alǵashqy jyldan-aq qarjyny ınfraqurylymdy jaqsartýǵa jumsadyq, bárin ornyna keltirdik. Búgin ortalyq stadıon tolyq jóndeýden ótkizildi, ÝEFA-nyń barlyq standarttaryna saı keledi. Zatobol kentindegi, Arqalyq, Rýdnyı qalalaryndaǵy stadıondar da jańa talappen jóndeldi. Búginde Rýdnyı qalasynda tutas sport kesheniniń qurylysy júrip jatyr, onda da fýtbol alańdary bar. Osyndaı jumystardyń bolashaq jeńisterdiń de alǵyshartyna aınalatyny sózsiz, – dedi Arhımed Begejanuly.
Saltanatta komanda kapıtany, esimi oblystan syrt jerlerge de tanymal fýtbolshy Nurbol Jumasqalıev jankúıerleri men áriptesterin jeńisimen quttyqtady. Sonymen qatar óziniń fýtbol mansabyn «Tobyldyń» óz alańynda «Qyzyljar» komandasymen kezdesýimen aıaqtaǵanyn habarlady. Ol osy oıynda da «Qyzyljar» qaqpasyna «Tobyldyń» bir dobyn ózi salǵan bolatyn.
Aıtpaqshy, oblystyń «Tobyl-2000» jastar quramasy da fýtbol ortalyqtary arasynda ótken Qazaqstan chempıonatynda «aǵasynyń» jolymen úshinshi oryn aldy.
Al fýtbol saltanaty estrada ónerpazdarynyń ánimen órnekteldi.
Názıra JÁRIMBET,
«Egemen Qazaqstan»
QOSTANAI