16 qarasha kúni keshki 19.00 shamasynda oblys ortalyǵy Qyzylorda qalasynan 130 shaqyrym jerde «Samara-Shymkent» tasjolynda 2 jolaýshylar avtobýsynyń soqtyǵysqany týraly habar kelip tústi, dep habarlaıdy Qyzylorda oblysynyń baspasóz qyzmeti.
Jol-kólik oqıǵasy týraly habar alǵannan keıin apat ornyna Qarmaqshy aýdanynyń ákimi Sultan Maqashov pen aýdan ákimdiginiń qyzmetkerleri, oblystyq densaýlyq saqtaý, jumyldyrý daıyndyǵy basqarmalary men jergilikti polısııa qyzmetiniń, sondaı-aq tótenshe jaǵdaılar departamenti jáne ishki ister departamentiniń basshylary bardy.
Oqıǵa ornynda jergilikti polısııa qyzmetiniń 34 qyzmetkeri,13 arnaıy tehnıka men 34 tótenshe jaǵdaılar departamentiniń mamany, 130 medısına salasynyń qyzmetkeri, onyń ishinde 16 dáriger jumyldyryldy. Sondaı-aq, 12 "jedel járdem" brıgadasy jumys istedi.
84 jolaýshyǵa kómek kórsetildi. Sonymen qatar, Jalaǵash jáne Qarmaqshy aýdandarynda eki aýrýhana jáne oblystyq medısınalyq ortalyq zardap shekkenderge kómek kórsetýde.
«Qazaly-Qyzylorda» men «Qyzylorda-Qarmaqshy» baǵytyndaǵy 2 avtobýsta barlyǵy 86 adam bolǵan. Ártúrli dárejedegi jaraqat alǵan 43 jolaýshy Qarmaqshy aýdandyq aýrýhanasyna, 6 adam Jalaǵash aýdanynyń ortalyq aýrýhanasyna, 5 adam oblystyq medısına ortalyqqa jetkizildi. Qalǵan 30 jolaýshyǵa alǵashqy medısınalyq kómek kórsetilip, ambýlatorııalyq emdeý sharalary taǵaıyndaldy. Apat ornynda 2 adam qaıtys boldy jáne aýyr jaraqat saldarynan aýrýhanada bir bala kóz jumdy»,-dedi oblystyq densaýlyq saqtaý basqarmasynyń basshysy Aqmaral Álnazarova.
Qaıtys bolǵan jandardyń otbasylaryna jergilikti bılik tarapynan jan-jaqty kómek kórsetiletin bolady.