Qazaqstan Syrtqy ister mınıstri Qaırat Ábdirahmanov Astanaǵa resmı saparmen kelgen Albanııa Respýblıkasynyń Eýropalyq jáne syrtqy ister mınıstri Dıtmır Býshatımen kezdesti.
Jalpy, atalǵan sapar eki memleket arasyndaǵy qarym-qatynastar tarıhynda syrtqy ister mınıstrleri deńgeıindegi alǵashqy sapar bolýymen erekshelenip otyr.
Syrtqy ister mınıstri Qaırat Ábdirahmanovpen ótken kelissózder barysynda taraptar saıası, saýda-ekonomıkalyq jáne mádenı yntymaqtastyqtyń qazirgi jaǵdaıy men keleshegin talqylady. Qurylys, energetıka, aýyl sharýashylyǵy, kólik-logıstıka, ınfraqurylym jáne týrızm salalary yntymaqtastyqtyń perspektıvalyq baǵyttary bolyp anyqtaldy.
Albanııa delegasııasy Qazaqstandaǵy sheteldik ınvestorlar úshin qolaıly jaǵdaılar men artyqshylyqtar týraly, sondaı-aq «Astana» halyqaralyq qarjy ortalyǵy sheńberindegi yntymaqtastyq múmkindikteri týraly habardar boldy.
Eki el arasyndaǵy taýar aınalymynyń kólemi tómen, osyǵan baılanysty saýda-ekonomıkalyq yntymaqtastyq qarqynyn qamtamasyz etý maqsatynda taraptar saýda-ekonomıkalyq yntymaqtastyq, ınvestısııalardy kótermeleý men ózara qorǵaý jáne qosarlanǵan salyq salýdy boldyrmaý týraly úsh negizgi kelisimge qol qoıý prosesin jedeldetý týraly ýaǵdalasty. Sonymen qatar kelissózderdiń kún tártibinde ózara quqyqtyq kómek kórsetý týraly qujattar bar.
Halyqaralyq jáne aımaqtyq kún tártibindegi ózekti máseleler, sonyń ishinde Ortalyq Azııa men Balqan aımaǵyndaǵy jaǵdaı týraly pikir almasyldy. Qazaqstan men Albanııanyń negizgi halyqaralyq máseleler boıynsha ustanymdarynyń uqsastyǵy BUU, Eýropadaǵy qaýipsizdik jáne yntymaqtastyq uıymy, Islam yntymaqtastyǵy uıymy sııaqty platformalar aıasynda áriptestikke múmkindik beretindigi atap ótildi.
Bul turǵyda Elbasy Nursultan Nazarbaevtyń halyqaralyq janjaldardy retteýdegi jeke úlesi atap ótilip, sondaı-aq Memleket basshysy Astana klýbynyń sheńberinde jasaǵan bastamalar – 1975 jylǵy Helsınkı prosesin jańartý, oǵan qosa 2020 jyly Astanada qaýipsizdik jáne yntymaqtastyq jónindegi konferensııany ótkizý jáne EQYU, Azııadaǵy ózara is-qımyl jáne senim sharalary jónindegi keńesi men ASEAN Aımaqtyq forýmynyń birinshi birlesken konsýltatıvtik kezdesýin uıymdastyrý týraly aıtyldy.
Kelissózder barysynda Qazaqstandyq tarap Albanııanyń 2020 jyly EQYU-ǵa tóraǵalyq etý kandıdatýrasyn qoldaýǵa jáne osy uıymǵa tóraǵalyq etý tájirıbesimen bólisýge daıyn ekendigin bildirdi. Al Albanııa tarapy Qazaqstannyń atalǵan uıymǵa tabysty tóraǵalyǵynyń tájirıbelerin paıdalanýǵa qulyqty ekendikterin bildirdi.
Resmı kezdesýden keıin jýrnalıster aldyna shyqqan mınıstrler eki eldiń qarym-qatynastarynyń mańyzdy baǵyttary týraly aıtyp berdi.
– Dıtmır Býshatı myrzanyń sapary ekijaqty qarym-qatynastardy odan ári damytýǵa jáne eki el arasyndaǵy yntymaqtastyqtyń bolashaǵyn aıqyndaýǵa jáne damytylýy tıis baǵyttardy nyǵaıtýǵa yqpal eterine senimdimin, – dedi Q.Ábdirahmanov.
Kezdesý aıasynda birqatar ekijaqty qujattarǵa – Qazaqstannyń Syrtqy ister mınıstrligi men Albanııanyń Eýropalyq jáne syrtqy ister mınıstrliginiń arasyndaǵy yntymaqtastyq týraly hattamaǵa, Qazaqstannyń Syrtqy saýda palatasy jáne Tırananyń saýda-ónerkásiptik palatasy arasynda ózara túsinistik memorandýmyna atalǵan qurylymdardyń basshylary qol qoıdy.
Serik ÁBDIBEK,
«Egemen Qazaqstan»