24 qarashada Kanadanyń Kvebek qalasynda kásipqoı boksshylardyń keshi ótedi. Bul jarysta Qazaqstannyń qos óreni óner kórsetedi. Olar – Nurzat Sabırov pen Sadrıddın Ahmedov.
Kásipqoı rıngtegi jeti kezdesýdiń barlyǵyn jeńispen aıaqtap, alty qarsylasyn nokaýtpen utqan ekinshi orta salmaqtaǵy 24 jastaǵy Nurzat Sabırov Rokkı Montoııa Pochekomen kúsh synasady. 36 jastaǵy Meksıkanyń ókili 34 márte sharshy alańǵa kóterilip, 32 ret basymdyq tanytty. 22 básekeni merziminen buryn aıaqtady. Montoııanyń kásipqoılar arasynda júrgenine 20 jyldan asa ýaqyt ótse de, ol tek bir ret qana WBC nusqasynyń óńirlik altyn belbeýi úshin talasqan eken. Alaıda sol kezdesýde aıtýly boksshy óziniń otandasy Davıd Lopesten utylyp qaldy.
Jastar arasyndaǵy álem chempıony, 20 jastaǵy Sadrıddın Ahmetov bıylǵy jyldyń kóktem aıynan beri kásipqoılar arasynda óner kórsetip júr. Soǵan qaramastan ol ózin jaqsy qyrynan kórsetip, kórermenderdiń kózaıymyna aınalyp úlgerdi. Ázirge tórt ret qana rıngke shyqqan qandasymyz barlyq jekpe-jegin aıqyn jeńispen aıaqtady. Endi birinshi jartylaı orta salmaqtaǵy Sadrıddın Ahmetov meksıkalyq Joze Fransısko Zınıgamen aıqasady. Ol 27 jasta. Kásipqoılar arasynda judyryqtasyp júrgenine jeti jyldan asty. Sol ýaqyt aralyǵynda 27 kezdesý ótkizgen Zınga 14 ret jeńiske jetti. 5 qarsylasyn nokaýtqa jiberdi. 11 márte utylyp, taǵy eki básekede teń esep tirkeldi.
Ǵalym SÚLEIMEN,
«Egemen Qazaqstan»