2018 jyl Aqtóbe oblysynda Bala jyly dep jarııalanyp, onyń sheńberinde «Baqytty bala» aýqymdy jobasy iske asyryldy. Bastamany Bilim jáne ǵylym mınıstrligi, otbasy jáne balalar máselelerimen aınalysatyn halyqaralyq uıymdar men qaıyrymdylyq qorlary qoldady. Bul týraly Aqtóbe oblysynyń ákimi Berdibek Saparbaev Ortalyq kommýnıkasııalar qyzmetinde ótken baspasóz máslıhatynda habarlady.
«Joba Prezıdenttiń «Rýhanı jańǵyrý» baǵdarlamasynda jınaqtalǵan tapsyrmalaryna negizdelgen. Kóptegen mańyzdy áleýmettik bastamalar júzege asyryldy. Basty maqsat - balalarǵa, olardyń ıntellektýaldy, fızıkalyq, rýhanı jáne adamgershilik damýyna jaǵdaı jasaý. Kelesi jyly joba Elbasy jarııalaǵan «Jastar jylynyń» aıasynda jalǵasady», - dedi spıker.
Jobany júzege asyrýǵa 4 mlrd. teńge bólindi. Budan basqa demeýshilik kómekter tartyldy. Nátıjesinde, azǵana ýaqytta Aqtóbe oblysynda elimizdegi alǵashqy jyl boıy «Kúnshýaq» saýyqtyrý ınklıýzıvti lageri, bıýdjetten tys qarajatqa aýtızmmen aýyratyn balalarǵa arnalǵan ortalyq, túzetý balabaqshasy, múmkindigi shekteýli balalarǵa arnalǵan ońaltý ortalyǵy, jyl boıy «Ásem» oqý-tanymdyq ortalyǵy ashyldy.
Budan basqa, 36 mektepke deıingi uıym, 177 sporttyq jáne oıyn alańdary, hokkeı korty, jazǵy akvapark, muz aıdyny, tennıs ortalyǵy paıdalanýǵa berilip, jeńil atletıkalyq manejdiń qurylysy jalǵasýda.
25 IT-klass ashylyp, mektepter 24 3D-prıntermen, 27 robot tehnıkasynyń jıyntyǵymen, 28 eksklıýzıvti fokýs-proektormen jabdyqtaldy.
Oblystyń 120 myń oqýshysy jazǵy demalystarmen qamtyldy, onyń ishinde 17 myń bala Qazaqstannyń kıeli jáne kórikti jerlerine týrıstik saparlarǵa shyǵyp, 11 myńnan astam daryndy bala Reseı, Tatarstan, Qytaı, AQSh jáne Malaızııa elderindegi eń jaqsy jazǵy demalys jáne bilim berý lagerlerinde boldy.
Jobanyń basty maqsaty jetim balalar men ata-anasynyń qamqorlyǵynsyz qalǵan balalarǵa tolyq qoldaý kórsetý boldy. Nátıjesinde jyl basynan beri kásiporyndar men memlekettik organdar balalardyń QTQJB-daǵy jınaq esepshottaryn 80 mln. teńgege tolyqtyrdy. 81 jetim balaǵa jańa páterler men úılerdiń kiltteri tabystaldy.