Qalalar damyǵan saıyn jaryqtandyrýǵa jumsalatyn qýat mólsheri de arta túsedi. Elektr qýatyna tólemderdiń ósýi, ekologııalyq jaǵdaılar energııa únemdeıtin ınnovasııalyq múmkindikterdi qarastyrýdy talap etedi.
Osy baǵytta ekologııalyq jáne ekonomıkalyq turǵydan tıimdi ıntellektýaldy júıelerdi qoldanysqa engizýdiń áleýeti zor. Jańa tehnologııalar negizinde jasalǵan jaryq beretin qondyrǵylar tehnıkalyq qyzmet túrleriniń, jóndeý jumystarynyń azaıýyna, jaryqshamdardyń uzaq ýaqyt qyzmet etýine múmkindik berýimen qatar qala úshin qaýipsiz.
Zamanaýı jaryqshamdarmen qamtamasyz etý qala kórkine ár berip qana qoımaı, energııa únemdeýge de múmkindik beredi. Almaty qalasy Energetıka jáne kommýnaldy sharýashylyq basqarmasynyń basshysy Maqsut Isahovtyń aıtýynsha, qazirgi kezde qala boıynsha jaryqshamdardyń sany 80 myńǵa jýyqtaıdy. Jyl sońyna deıin qala kóshelerin jarqyratyp turatyn shyraǵdandardyń 31,5 paıyzy nemese 24 myńy energııa únemdeıtin jáne jaryqdıodty túrlerine almastyrylady.
Búginde Bostandyq aýdanyna qarasty Baǵanashyl, Alataý, Ermensaı jáne Nurlytaý shaǵyn aýdandarynda 35,3 shaqyrymǵa (1333 jaryqsham) jaryqdıodty shamdar qondyrylsa, áýejaıdan bastap Maılın, Buqtyrma kósheleri men Qulja dańǵyly, ál-Farabıden Saın, Toraıǵyrov kóshesine (4314 jaryqsham) deıingi Shyǵys aınalma jolyndaǵy jaryqshamdar jaryqdıodty túrlerine almastyrylǵan. «Alataý Jaryq Kompanııasynyń» elektr júıelerin qaıta qalpyna keltirýi nátıjesinde qalanyń 8 yqshamaýdanyndaǵy 186 kóshede 3807 jaryqsham jańasymen aýystyryldy. Qazirgi kezde Jarokov kóshesinde, О́tepov kóshesinen Tóle bıge deıingi aralyqta 720 shyraǵdan zamanaýı kórik berip tur. Aldaǵy josparǵa sáıkes jyldyń sońyna deıin Alataý aýdanynda 24 shaqyrymdaǵy 730 jaryqsham qondyrylatyn bolady. Al Áýezov aýdanyndaǵy Dýbok 1-2, Dostyq, Shkolnyı, Mamyr yqshamaýdandarynda 49,5 shaqyrym júıelerdegi 1612 jaryqsham jańalanbaq.
Almaty qalasy Energetıka jáne kommýnaldy sharýashylyq basqarmasy «Almaty qalasynyń syrtqy jaryq kózderin jańartý» memlekettik-jekeshelik áriptestik aıasynda 2019-2026 jyldarda 1375 shaqyrym syrtqy jaryq júıesi men 45829 jaryqshamdy jáne de 42052 tirekterdi jańartýdy josparlap otyr. Jaryq bergish qondyrǵylardy almastyrýda otandyq óndirýshilerdiń ónimderi paıdalanylýda. Qaıta jańartylǵannan keıin Almaty qalasy energııa únemdi LED jaryqshamdarymen tolyq qamtamasyz etilmek.
Elvıra SERIKQYZY,
«Egemen Qazaqstan»
ALMATY