Astanada Tuńǵysh Prezıdent kúnine oraı ártúrli salanyń úzdikterin partııa qataryna qabyldaý rásimi ótti.
Merekelik is-shara «Nur Otan» partııasynyń hatshysy Tamara Dúısenovanyń quttyqtaý sózimen ashyldy.
«Táýelsiz Qazaqstan halqy osydan 27 jyl buryn óziniń Tuńǵysh Prezıdentin saılap, óz tańdaýyn jasady. Elimizdiń búgingi jetistikterine qarap sol kezde qazaqstandyqtardyń qatelespegenin ańǵarýǵa bolady. Biz azattyqtyń 27 jylynda Elbasy saıasatynyń arqasynda kóptegen jetistikterge jettik. Halyqaralyq arenada da óz ornymyzdy aıqyndap, úlken abyroı-bedelge ıe boldyq. Sondyqtan Memleket basshysynyń elge sińirgen eńbegin dáripteıtin búgingi merekeniń máni men mańyzy zor. «Nur Otannyń» jańa múshelerine partııa bıletterin tabystaý rásimi osy bir ataýly kúnmen tuspa-tus kelip otyr. Árbirińiz el áleýetiniń damýyna óz úlesterińizdi qosasyzdar dep senemin», dedi ol.
Budan ári T.Dúısenova el ıgiligi úshin eńbek etip júrgen 20 qazaqstandyqqa partııa bıletterin tabystady. Onyń aıtýynsha, jas jáne belsendi azamattardyń «Nur Otan» partııasyna múshe bolýy olardyń Memleket basshysynyń bastamalaryn júzege asyrýǵa daıyn ekenin bildiredi.
«Nur Otannyń» jańa músheleri qatarynda belgili jýrnalıst, «Qazaq radıolary» JShS-na qarasty «Qazaq radıosy» respýblıkalyq radıoarnasynyń dırektory Serik Ábdýálıev te bar. Ol Elbasy kúni qarsańynda Prezıdent partııasynyń múshesi atanǵanyna qýanyshty ekenin aıtty.
«Qazaqta «eki dúnıeń abat bolsyn, eki toıyń qabat bolsyn» degen sóz bar. Sol sııaqty búgin men úshin eki birdeı qýanysh qatar kelip otyr. Tuńǵysh Prezıdentimizdiń kúninde osyndaı úlken qurmetke bólenip, Elbasymyzdyń barlyq saıasatyn dáriptep, senimdi tiregi bolyp otyrǵan «Nur Otan» partııasynyń múshesi atanyp otyrmyn. Bul men úshin úlken abyroı ári zor jaýapkershilik. Sondyqtan aldaǵy ýaqytta Elbasy bastamalarynyń júzege asýyna óz úlesimdi qosý úshin aıanbaı eńbek etemin», dedi ol.
Dástúr boıynsha ár jyl saıyn Tuńǵysh Prezıdent kúnine oraı elimizdiń barlyq óńirinde partııaǵa qabyldaý rásimi ótedi. Bıyl Respýblıka boıynsha 2 myńnan astam qazaqstandyq partııalyq bıletke ıe boldy.
Marjan TILEÝBEK,
«Egemen Qazaqstan»