Túrkistan oblysy ákimi janyndaǵy «Yrys aldy – yntymaq» qoǵamdyq forýmy aıasynda ótken alqaly jıyndy óńir basshysy Janseıit Túımebaev «Túrkistan tuǵyry – tektilik pen tatýlyq» dep ataýdy usyndy.
Negizgi maqsaty Elbasynyń «Uly dalanyń jeti qyry» maqalasy sheńberinde atqarylyp jatqan jáne josparlanǵan jumystardy, pikir-usynystardy talqylaý bolatyn jıynda jazýshy Marhabat Baıǵut, Saryaǵash aýdany ardagerler keńesiniń tóraǵasy Mustafa Súleımenov, Jetisaı aýdany qoǵamdyq keńesiniń tóraǵasy Toıym Júnisov, tarıh ǵylymdarynyń doktory, arheolog Baýyrjan Ábishuly, Q.A.Iаsaýı atyndaǵy HQTÝ-nyń túrkolog ǵalymy Seısenbaı Qudasov, Halyqaralyq «Túrkologııa» ortalyǵynyń ǵylymı qyzmetkeri Qazybek Tájıev, tarıh ǵylymdarynyń doktory, arheolog Muhtar Qoja sóz sóılep, óz oılaryn ortaǵa saldy.
Al Túrkistan oblysynyń ákimi Janseıit Túımebaev baıandamasynda, jıynnyń mańyzdylyǵyna toqtaldy. «Uly dalanyń jeti qyry» maqalasynda Elbasy Túrkistanǵa arnaıy toqtalyp, uly shahardy damytý máselesin aıtty. Mine, osyǵan oraı, maqalada aıqyn kórsetilgen tarıhymyz ben jobalardy qolǵa alyp, aýqymdy jumystardy júzege asyrýda jáne Túrkistan oblysyn damytýǵa barlyǵymyz birlik pen tatýlyqty tý etip eńbek etýimiz kerek», - dedi oblys ákimi.
Jıynǵa qatysýshylar aıtylǵan usynys-pikirlerdi talqylaı kele, qarar qabyldady. Sondaı-aq, Alqaly jıynda óńir basshysy «Bolashaqqa baǵdar: rýxanı jańǵyrý» baǵdarlamalyq maqalasynyń «Týǵan jer» arnaıy jobasy aıasynda týǵan jerine súbeli úles qosyp júrgen Syrym Ertaev, Talǵat Ysqaqov, Aıyphan Aıymbetov, Baǵlan Súgirbaev syndy azamattardy «Jomart júrek» syılyǵymen marapattady. Rýhanı sharanyń sońy «Ońtústiktiń qasıetti oryndary: ańyz-ápsanalar», «Ońtústik Qazaqstan oblysynyń tarıhı oryndary men kıeli jerleri» atty kitaptardyń tusaýkeserine ulasty.
Ǵalymjan ELShIBAI,
«Egemen Qazaqstan»
Túrkistan oblysy