Almaty oblysynda ótken halyqaralyq «Sonar – 2018» búrkitshiler baıqaýynan Shyǵystyń qusbegileri oljaly oraldy.
Álemniń 10-nan astam elinen 90 qyrandy qolyna qondyryp ákelgen saıysta úrjarlyq О́mirbek Nuǵymulynyń «Muzbalaǵy» birinshi oryndy jeńip alypty. Halyqaralyq dodanyń qoıanǵa salý synynda О́mirbektiń búrkiti qoıandy qanatymen soǵyp, aspanǵa qaıqańdap qaıta shyǵyp tómen sorǵalaǵan qalpy ilip kórermendi tańǵaldyrypty. Al túlkige salǵan sońǵy sheshýshi básekede alpys eki aılaly túz taǵysyn da qalt jibermepti. Túz taǵylarynyń tartysynda Táttimbek Kápulynyń qyrany úzdik ondyqty túıindese, Erzat Baıqadamov pen Ermek Jetpisovtiń qyrandary shırek fınalǵa jetip jyǵylypty. «Shyǵys-Altaı» búrkitshiler federasııasynyń prezıdenti Táttimbek Kápuly Alataý baýraıynda uıymdastyrylǵan búrkitshiler baıqaýyna tórt búrkit aparǵandaryn aıtady.
Reti kelgende aıta keteıik, búginde Shyǵys Qazaqstanda búrkitti tek Úrjar aýdanynyń ǵana qusbegileri baptap, jarystarǵa qosyp júr. Jaqynda ulttyq ónerdi ulyqtaýǵa qosqan úlesi úshin T.Kápuly Úrjar aýdanynyń qurmetti azamaty atandy.
Azamat QASYM,
«Egemen Qazaqstan»
Shyǵys Qazaqstan oblysy,
Úrjar aýdany