Parlament Senaty Ekonomıkalyq saıasat, ınnovasııalyq damý jáne kásipkerlik komıtetiniń keńeıtilgen otyrysynda «Tabıǵı monopolııalar týraly» zań jobasy qaraldy.
Zań jobasy tabıǵı monopolııalar sýbektileri qyzmetiniń tıimdiligin arttyrýǵa, tarıfterdi qalyptastyrý prosesiniń ashyqtyǵyn qamtamasyz etýge, tarıftik smetalar men ınvestısııalyq baǵdarlamalardyń oryndalýyna baqylaýdy kúsheıtýge, sondaı-aq osy salalarǵa ınvestısııalardy ulǵaıtýǵa baǵyttalǵan.
Qujat tabıǵı monopolııanyń salalary men osy salalardaǵy Sýbektilerdiń memlekettik tirkelimin qalyptastyrý tártibin aıqyndaıdy, sondaı-aq tabıǵı monopolııalar sýbektiler qyzmetine tarıfterdiń túrleri men olardy belgileý tártibin retteıdi.
Zańnamalyq deńgeıde rettelip kórsetiletin qyzmetterdiń sapasy men senimdilik kórsetkishterin, sondaı-aq tabıǵı monopolııalar sýbektileri qyzmetiniń tıimdilik kórsetkishterin aıqyndaýdy kózdeıtin tarıfti retteýdiń yntalandyrý ádisteri engiziledi.
Tabıǵı monopolııalar sýbektileri qyzmetiniń ashyqtyǵyn arttyrý, tarıftik smetalar men ınvestısııalyq baǵdarlamalardyń oryndalýyn baqylaýdy kúsheıtý maqsatynda zań jobasymen memlekettik retteý prosesiniń jarııalylyǵy kózdeledi. Osyǵan oraı, Tarıftik saıasat jónindegi keńes engiziledi jáne qoǵamdyq birlestikterdiń jumys isteýi retteledi, sondaı-aq, tabıǵı monopolııalar sýbektileriniń buqaralyq aqparat quraldarynda bekitilgen tarıftik smetalar men ınvestısııalyq baǵdarlamalardyń oryndalýy týraly esepterdi ornalastyrý jónindegi mindeti kózdeledi.
Sonymen qatar, zań jobasymen ınvestısııalyq baǵdarlamanyń oryndalýyna jáne tabıǵı monopolııalar sýbektileri qyzmetiniń tıimdilik kórsetkishterine qol jetkizýge qoǵamdyq monıtorıng pen tehnıkalyq saraptama júrgizý tártibi belgilenedi.
Senatorlar «Qazaqstan Respýblıkasynyń keıbir zańnamalyq aktilerine memlekettik satyp alý jáne kvazımemlekettik sektor sýbektileriniń satyp alý máseleleri boıynsha ózgerister men tolyqtyrýlar engizý týraly» zań jobasyn da talqylady.
Túzetýler 14 zańnamalyq aktige, onyń ishinde Bıýdjet, Kásipkerlik, Salyq jáne Ákimshilik quqyq buzýshylyq týraly kodeksterge jáne 10 zańǵa engiziledi.
Qujatta ortalyqtandyrylǵan qyzmet negizinde memlekettik satyp alýlardyń biryńǵaı júıesin engizý, kvazımemlekettik sektorda satyp alý ótkizý ádisterin qaıta qaraý qarastyrylyp otyr. Memlekettik organdar men kvazımemlekettik sektor sýbektileriniń aqparat júıesinde elektrondyq túrde biryńǵaı satyp alý ornyn qurý kózdelgen.
Kvazımemlekettik sektordyń satyp alýlaryn retteıtin quqyqtyq erejelerin buzǵany úshin ákimshilik jaýaptylyq engiziledi. Memlekettik satyp alý júıesinde shaǵymdar veb-portaly arqyly berilgen málimetterdi, sondaı-aq olardy qaraý nátıjeleri boıynsha qabyldaǵan sheshimderdi kórsetetin respýblıkalyq shaǵymdar tizimdemesin qalyptastyrý jáne engizý kódelýde.
Zań jobasymen áleýetti jabdyqtaýshynyń qarjylyq ornyqtylyǵy jóninde jańa biliktilik talaptary belgilenip otyr. Sondaı-aq ofshorlyq aımaqtarda tirkelgen áleýetti jabdyqtaýshylardyń satyp alýǵa qatysýyna tyıym salynatyn boldy.
Komıtet otyrysynda sol kúni «Qazaqstan Respýblıkasy men Halyqaralyq Qaıta Qurý jáne Damý Banki arasyndaǵy № 8156-KZ Qaryz týraly kelisimge (Shyǵys – Batys avtomobıl joldaryn damytý jobasy (Almaty – Qorǵas ýchaskesi): Batys Eýropa – Batys Qytaı halyqaralyq tranzıt dálizi (OAО́EY 1b) túzetýlerge qatysty QR men HQQDB arasyndaǵy kelisim-hatty ratıfıkasııalaý týraly» zań jobasy da qaraldy.
Qujatta «Ortalyq-Ońtústik» dálizindegi «Astana – Qaraǵandy – Balqash – Kúrti – Qapshaǵaı – Almaty» avtomobıl jolynyń «Balqash – Býrylbaıtal» qosymsha bóligin qosý qarastyrylǵan. Respýblıkalyq bıýdjet komıssııasynyń 2018 jylǵy 11 qańtardaǵy otyrysynyń hattamasy boıynsha, «Balqash – Býrylbaıtal» bóligin jańǵyrtý HQQDB qaryzynyń únemdelgen qarjysy men respýblıkalyq bıýdjetten qosymsha qarjylandyrý esebinen qarjylandyrý maquldandy.
Zań jobalary Palatanyń qaraýyna jiberildi.