Taıaýda Amerıka Qurama Shtattarynan elimizge jaqsy jańalyq jetti. Almaty qalasyndaǵy fızıka-matematıka baǵytyndaǵy Nazarbaev zııatkerlik mektebiniń 12-synyp oqýshysy Aqnazar Qajymurat Garvard ýnıversıtetiniń bilim grantyna ıe boldy.
Topologııany álemdik deńgeıde zerttep júrgen jas darynnyń talabyna tabys tilep súıinshileýimizdiń jóni bar. Olaı deıtin sebebimiz, matematıkanyń atalǵan bóliminde úlken jetistikke jetip úlgergen Aqnazar – Nazarbaev zııatkerlik mektepteriniń 10 jyldyq mereıtoıyna arnalǵan «Uly dala muragerleri» forýmynda Elbasydan bata alǵan oqýshy. О́ziniń ǵylymı jumysyn Memleket basshysynyń aldynda baıyppen saýatty tanystyryp shyqqan Aqnazarǵa Prezıdent sol kezde-aq Garvard ýnıversıtetine túsetinine sendirgen bolatyn.
Qazaqstandyq výnderkındti Garvardqa fızıka men matematıkadan uıymdastyrylǵan álemdik bedeldi olımpıadalardaǵy jeńisteri bastap bardy deýge bolady. Kúni keshe Aqnazar halyqaralyq emtıhandarda tańǵalarlyq nátıje kórsetti. ACT men SAT Subject Tests, eń joǵarǵy – 36 dan 36 jáne 2400 den 2400 upaı aldy. Garvard ýnıversıtetiniń https://college.harvard.edu saıtyndaǵy aqparat boıynsha oqýǵa túskenderdiń tórtten bir bóligi ACT-dan 33 ball alsa, qalǵan 75%-y 35 upaı jınaǵan.
Elimizdiń Táýelsizdik kúni qarsańynda A.Qajymurattyń jetistigi barsha Zııatkerlik mektepter júıesi úshin syı boldy. Daryndy oqýshy atalǵan aspırantýrany aıaqtaǵannan soń Qazaqstanda ǵylymmen aınalysatyndyǵyn aıtady.
1636 jyly qurylǵan AQSh-tyń kóne oqý ornyna shákirt bolǵan Aqnazarǵa alar asýlaryń alasarmasyn deımiz.
Mıras ASAN,
«Egemen Qazaqstan»