Almaty qalasyna jumys sapary aıasynda QR Premer-Mınıstri Baqytjan Saǵyntaev «Almaty bas jospary» ǵylymı-zertteý ınstıtýtynda bolyp, ońtústik astanany odan ári damytý josparymen tanysty.
Bıylǵy qarasha aıynda qoldanysqa berilgen ınstıtýttyń jańa ǵımaratyn qaraǵan Premer-Mınıstr sıtýasııalyq ortalyqtyń jumysymen tanysty. Nıý-Iork, Sıngapýr, London úlgisimen qalany tıimdi basqarý úshin Big Data úlken aqparat platformasy quryldy. Basqasha aıtqanda, bul Almaty qalasyn basqarýdyń bolashaq oılaý ortalyǵy. Sıtýasııalyq ortalyqta 10 qalalyq jáne respýblıkalyq júıe biriktirilgen. 2 jyl ishinde 27 júıe men derekter bazasyn biriktirý josparlanyp otyr. Júıede qalanyń avtotrafıgi jónindegi derekter, qoǵamdyq kóliktiń jolaýshylar aǵynynyń kúndelikti kólemi, mektepter men balabaqshalardyń júktemesi týraly málimetter bar. Qylmys jaǵdaıyn taldaý, bıýdjettiń oryndalýyn baqylaý boıynsha saraptama júrgizilip jatyr.
Qala ákimi B. Baıbek naqty ýaqyt rejıminde 1000-nan asa damý ındıkatory boıynsha taldaý júrgizilip jatqanyn habarlady. Big Data taldaýy negizinde ártúrli qalalyq kórsetkishterdiń uzaq merzimdi boljam modeli qurylýda: Almaty ekonomıkasynyń tıimdiligi, halyqtyń sany men quramy, áleýmettik-ekonomıkalyq damýǵa janama faktorlarynyń áseri. Basqarýdyń naqty sheshimderinde kórinis tabatyn megapolısti basqarýdyń túrli modelderi ázirlenip jatyr.
Budan basqa, Almaty qalasynyń sıfrly 3D-golografııalyq maketi men túrli máselelerdi sheshýde halyqqa qyzmet kórsetý úshin qurylǵan «Open Almaty» qoǵamdyq qabyldaýynyń jumysy tanystyryldy. Qoǵamdyq qabyldaý keńsesinde barlyq aýdan ákimdikteri, turǵyn úı basqarý, jumyspen qamtý jáne áleýmettik qorǵaý, jolaýshylar kóligi, tabıǵı resýrstar jáne sáýlet, qalalyq prokýratýra, polısııa, memlekettik kiris bólimi, TJD, HQKO, Kásipkerlerdiń ulttyq palatasy ókilderi men medıatorlar qyzmet kórsetedi.
Instıtýt aýmaǵynda Prezıdenttiń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýynyń aıasynda júzege asqan draıver-jobalardyń tanystyrylymy ótti. 2018 jyldyń basynan beri jobalyq qaǵıdamen «Almaty damýynyń 50 draıveri» bastamasy júzege asty. Maqsat — ekonomıkany ári qaraı ósirip, qalanyń bet-beınesin túbegeıli ózgertý.
Almaty q. ákiminiń orynbasary S. Mákejanovtyń aıtýynsha, búgingi tańda 124 mlrd teńgege 50-den 18 joba iske asyrylǵan. Jobalardyń kóbisi áleýmettik salada — 30%, kólik salasynda — 25%, energetıka jáne abattandyrý salalarynda 10%-dan júzege asyrylýda. Buǵan qosa, qalada «Sıfrlyq Qazaqstan» jobasy belsendi túrde iske asyrylyp jatyr. Almatyda onlaın saýda, avtomattandyrylǵan logıstıka, baǵdarlamalyq qamsyzdandyrý, blokcheın tehnologııalar salasynda jumys isteıtin 40 kompanııadan turatyn tehnologııalyq hab qurylǵan. Qazirgi tańda AT-ónimder óndirisindegi qalanyń úlesi 50% quraıdy. Smartcity aıasynda qaýipsizdik, jelilik belsendilikke monıtorıng júrgizý, qoǵamdyq kólik, bilim berý jáne densaýlyq saqtaý salalarynda júıelik sıfrlyq jobalar iske asyrylyp jatyr.