Jastardy jumyspen qamtý, olardy jumysshy mamandyqtaryna oqytý máselesi búginde ózekti. Elbasy árdaıym bul jaıynda aıtyp keledi. Barlyq deńgeıdegi ákimder esep bergende de qanshama adamnyń jumysqa ornalasqanyn málimdep jatady. Sonymen qatar oblys ortalyǵynan, bolmasa aýdandardan kásiporyn ashylatyn bolsa da qansha jumys ornynyń ashylatynyn súıinshileı jetkizedi. Bul árıne jaqsylyqtyń nyshany.
Jýyrda Jambyl oblysyna Úkimet basshysy jumys saparymen kelip, Prezıdent Joldaýynyń óńirdegi iske asyrylý barysymen tanysqany belgili. Taraz qalalyq jumyspen qamtý ortalyǵynda Premer-Mınıstrge qansha azamattyń jumysshy mamandyqtary boıynsha bilim alǵany baıandaldy. Árıne memlekettiń qoldaýy nátıjesinde júzege asqan jumystyń jemisi bolady. Biraq Úkimet basshysy 4 myńnan asa azamattyń qanshasy jumyspen qamtylǵany týraly ortalyq dırektory Eldos Keńesbekovten suraǵanynda, ol eshteńe bilmeı daǵdardy. Talaı jumyssyz turǵynnyń úmit kútip otyrǵan ortalyǵynyń basshysy bul máseleden beıhabar eken. Tek syrǵytpa jaýappen, ıaǵnı qyryq bes paıyzy jumyspen qamtyldy degen sózben de qutyla almady. Úkimet basshysy naqtylap qaıta surap edi, sol kúıi únsiz qalǵan. Tym bolmasa osyndaı jaýapty kezeńde daıyndalýyna bolady ǵoı. Basshynyń mindeti sıfr jattaý bolmasa da, ózi atqaryp otyrǵan jumysty ózi bilmeıtini qaı aqylǵa syıady. Sonda kóbisiniń jumysy tek qyzmettik ornyna baryp-qaıtý ǵana bolǵany ma? Álde tek buıryq berý isti ilgerilete me? Al tıisti mekeme basshylary ózderiniń jumysyn osylaı bilmeı jatqanda, ózgelerden ne suraýǵa bolady.
Basshy bilmegendi qosshy qaıdan biledi. Kópshilik senip otyrǵan basshylardyń bolmashy nárseni bilmeýi qoǵamǵa paıda ákelmesi anyq.
Hamıt ESAMAN,
«Egemen Qazaqstan»
Jambyl oblysy