Kókshetaýda oblystyq ákimdiktiń qoldaýymen «Rýhanı jańǵyrý» baǵdarlamasy aıasynda «Sal-seriler» serııasymen jaryq kórgen «Aqan seri» kitabynyń tusaýkeseri ótkizildi.
Aqan serige arnalǵan shyǵarmalar qatary búgin mazmuny tereń jańa týyndymen tolyp otyr. Urpaqqa rýhanı azyq bolar qundy dúnıelerdi qurastyryp, seri babanyń óleńderi men aıtystaryn toptastyrǵan Qazaqstannyń eńbek sińirgen qaıratkeri, dramatýrg Jabal Erǵalıev.
– Elbasynyń «Rýhanı jańǵyrý» baǵdarlamasyna sáıkes, bul is Aqmola oblysynyń ákimi Málik Myrzalınniń tikeleı bastamasymen jáne qoldaýymen júzege asyryla bastady. Bıyldyń ózinde oblys basshysynyń qoldaýymen akademık, batyr ári ǵalym Málik Ǵabdýllınniń 11 tomdyǵy, «Málik Ǵabdýllın – qazaqtyń Oqjetpesi», «Jer jánnaty Aqmola» fotoalbomdary, Sáken Júnisovtyń «Zamanaı men Amanaıy» Londonda aǵylshyn tilinde, tarıhshy Qadyrjan Ábýevtiń kitaptary jaryq kórip, oqyrmandardyń yqylasyna bólendi. Meniń de «Álemge! Ǵaryshqa! Bolashaqqa jol ashqan Tuńǵysh!» atty Elbasy jaıly kitabym da ákimniń qoldaýymen basylyp shyqty. Aqmola oblysynyń ákimi Málik Myrzalınniń tapsyrýy jáne qoldaýymen «Sal–seriler» kitaphanasy serııasymen Kókshetaý men Qaraótkel óńirleriniń sal-serileriniń muralaryn jınaqtap kitap shyǵarýdy qolǵa aldyq,–dedi Jabal Erǵalıev.
«Sal-seriler» kitaphanasy serııasynyń alǵashqy kitaby «Aqan seri» jaryq kórip, oqyrman qolyna tıdi. Taǵylymdy keshte el aǵasy Shııap Álıev, Iran sal Tasqara, Meırambek Qıyqov, ǵalym, ádebıetshi Musataı Ǵalym, aqyn Qudaıberli Myrzabek, Aqan seri atyndaǵy joǵary mádenıet kolledjiniń qazaq tili men ádebıeti pániniń oqytýshysy Aqmaral Qońyrqyzy jáne taǵy basqalary sóz sóılep, kitaptyń qundylyǵy haqynda óz oılaryn ortaǵa saldy.
Tusaýkeser barysynda oblystyq mádenıet basqarmasynyń basshysy Rústem Bıkenov taǵy bir jaǵymdy jańalyqty ortaǵa saldy. Basqarma basshysynyń aıtýynsha, aldaǵy jyly «Astana-Kókshetaý» tas jolynyń boıyna Úkili Ybyraı, Birjan sal, Aqan seri, Balýan Sholaq jáne Kenesary hannyń eskertkishteri qoıylady.
Ádebı keshte oblystyq fılarmonııanyń ánshileri áýelete án shyrqap, shólirkegen shóldi qandyrdy. Taǵy bir aıta keterligi jastar Aqandaı ór tulǵanyń ómiri men shyǵarmashylyǵyn pash eter kitap kórmesinen mol maǵlumat aldy.
Baıqal BAIÁDIL,
«Egemen Qazaqstan»