Aqtóbede ótip bara jatqan jyly jetistikterimen erekshelengen ata-ana qamqorynsyz qalǵan, múmkindigi shekteýli jáne jetim balalar, barlyǵy 202 baldyrǵan úshin Prezıdent shyrshasy ótti.
Oblystaǵy balalarǵa arnalǵan bıylǵy jańajyldyq qoıylym «Jarqyra, Qazaqstan! Jarqyra, týǵan jer!» dep ataldy. Merekelik sharaǵa oblys ortalyǵy men barlyq aýdandardan kelgen balalar qatysty.
Shyrshanyń shamdary jaǵylyp, el Prezıdenti Nursultan Nazarbaevtyń quttyqtaýynan keıin oblys ákimi Berdibek Saparbaev memleket basshysynyń atynan ár balaǵa syılyqtar tabys etti.
«Prezıdent tapsyrmasymen bizder - jergilikti atqarýshy bılik organdary balalarymyz sapaly bilim alyp, sportpen shuǵyldanyp, ónermen aınalysyp, jan-jaqty damýlary úshin barlyǵyn jasap jatyrmyz. О́tken jyl bizdiń oblysta Bala jyly bolǵanyn ózderińiz de bilesizder. Osy jyldyń ishinde qanshama balalarǵa arnalǵan mektepke deıingi mekemeler, sporttyq jáne oıyn alańdary salyndy, IT-synyptar ashyldy, daryndy balalardyń deni bıylǵy jazda shetelde demaldy. Osynyń bári balalarymyz ózge óńirlerde, basqa elde turatyn qatarlastarynan qalmaı, oı-óristerin keńeıtýleri úshin. Alaıda, eń bastysy, bizdiń Prezıdent aıtqandaı, týǵan Qazaqstanymyzdyń atyn shyǵaratyn laıyqty azamat bolyp ósý úshin osy ıgilikterdiń barlyǵyn paıdalana otyra, úzdik ári jaqsy oqyp, úlkenderdi tyńdaýǵa jáne olardy qurmetteýge tıissizder»,- dedi Berdibek Saparbaev.
Aıta keteıik, balalar Aıaz Ataǵa jazǵan hattaryndaǵy syılyqtarynyń barlyǵyn aldy. Olar velosıped, gıroskýter, planshet, teledıdar, noýtbýk jáne t.b. suraǵan. Ár hatta kitaptarǵa, negizinen ensıklopedııalarǵa suranys bar ekenin eskerý kerek. Jetinshi synypta oqıtyn Ásel tigin mashınasyn, eki jas mýzykant – Meırambek pen Kárim qoldan jasalǵan dombyra surasa, Alǵa aýdanynynda turatyn besinshi synyp oqýshysy Sandýǵash fotoapparatty boldy.
Balalarǵa arnalǵan jańajyldyq shyrsha merekelik túski aspen jalǵasyp, murajaıǵa qydyrdy, Aqtóbedegi bas shyrshany tamashalady.
Budan basqa, bıyl óńirde «Balalarǵa qýanysh syıla» atty aýqymdy aksııa ótip, sonyń aıasynda memlekettik organdardyń, bıznes qoǵam ókilderi Aıaz atamen jáne Aqshaqarmen birge erekshe bilim berýdi qajet etetin 3626 balany quttyqtap, syılyqtar tartý etedi.
Temir QUSAIYN,
«Egemen Qazaqstan»