Jurtshylyq kóbine jedel járdem qyzmetiniń jumysyna kóńili tolmaı, shaqyrtýlarǵa sala qyzmetkerleriniń keshigip jetetindigi týraly syn aıtatyn. Sońǵy ýaqytta osy orny tolmas olqylyqtardy boldyrmas úshin densaýlyq saqtaý mekemeleri túrli jaqsy jobalardy qolǵa ala bastady.
Mine, sondaı ıgilikti bastamany Shymkenttegi jedel járdem qyzmeti alǵashqylardyń biri bolyp qolǵa aldy. Endi munan bylaı «103» birińǵaı baılanysyndaǵy qyzmetkerler 100 paıyz sandyq júıege kóship, smartfonmen qamtyldy. Bir sózben, medısınalyq qyzmetter elektrondy júıege kóshti.
Osy arqyly jedel jáne shuǵyl medısınalyq járdem brıgadasyn shaqyrtý kartasyn, ýchaskelik dárigerdiń dabyl qaǵazyn jáne jedel medısınalyq járdem stansııasynyń ilespe paraǵyn smartfonǵa engizetin boldy. Bul degenimiz jedel qyzmet kórsetetin brıgadalar ortalyq stansaǵa kelmeı-aq qolyndaǵy smartfon arqyly tikeleı shaqyrtýǵa bara alady. Osynyń arqasynda medısına qyzmetkerleri áýeli ýaqyt únemdelse, ekinshiden qaǵazbastylyqtan qutylady.
«Memleket basshysy Nursultan Nazarbaevtyń Qazaqstan halqyna Joldaýynda berilgen tapsyrmalardyń biri - 2019 jyldyń 1 qańtarynan bastap medısına salasy qaǵazsyz qujat aınalymyna kóshý bolatyn. Sondaı-aq Joldaýda densaýlyq saqtaý salasynyń mamandaryna aqparattyq júıelerdi biriktirý, mobıldik sıfrlyq qosymshalardy qoldaný, elektrondyq densaýlyq pasportyn engizý, qaǵaz qoldanbaıtyn aýrýhanaǵa kóshý arqyly medısınalyq kómektiń qoljetimdiligi men tıimdiligin arttyrý qajet, degen mindet júktegen bolatyn. Memleket basshysynyń tapsyrmasyn basty nazarǵa ala otyryp, Shymkent qalasynyń jedel járdem stansııasy alǵashqylardyń biri bolyp qaǵazsyz jumys jasaýǵa kóshti. Endi jedel járdem qyzmetkerleri burynǵydaı qaǵaz toltyrmaıdy», deıdi qalalyq densaýlyq saqtaý basqarmasynyń basshysy Nurlan Qasymov.
Qazirgi tańda mıllıondy shahar turǵyndaryna 81 jedel járdem brıgadasy qyzmet kórsetedi. Barlyq jedel járdem brıgadalary smartfomen qamtylǵan. Kúnine qala boıynsha ortasha eseppen 15000-16000 shaqyrtý túsedi. Ortalyqqa kelip túsken qońyraýlardyń 20 paıyzy 4 -shi sanattaǵy shaqyrtý bolǵandyqtan, meken-jaıy boıynsha emhanalarǵa tikeleı joldanady, deıdi sala jaýaptylary.
Aıta keterligi, qaladaǵy jedel járdem mekemeleriniń ortalyǵynda Call Center jumys isteıdi. Osy ortalyq arqyly jedel járdem kóliginiń qaı mańda júrgenin, naqty meken-jaıǵa neshe ýaqytta jetkenin arnaıy qurylǵynyń kómegimen baqylap otyrýǵa bolady. Ǵımarattaǵy úlken ekrannan brıgadalardy da qadaǵalaýǵa múmkindik bar.
Nurshat TО́KEN,
«Egemen Qazaqstan»