«Qazaqstandyqtardyń ál-aýqatynyń ósýi: tabys pen turmys sapasyn arttyrý” Joldaýynda atap kórsetilgen «sybaılas jemqorlyqtan ada óńirler» jobasynyń tájirıbesin taratý jónindegi tapsyrmasyna sáıkes «Qyzyljar – adaldyq alańy» keńsesi óz jumysyn bastady.
Oqýshylar saraıynda ornalasqan ozyq jobaly keńseniń ashylý saltanatyna óńirimizge jumys saparymen kelgen Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Oljas Bektenov pen oblys ákiminiń orynbasary Madııar Qojahmet qatysty.
«Keńseniń mindeti turmystyq sybaılas jemqorlyq deńgeıin qysqartýǵa, densaýlyq saqtaý, bilim berý sııaqty áleýmettik, sondaı-aq, quqyq qorǵaý salalarynyń jumysyn taldaýǵa, paraqorlyq jaǵdaılarynyń aldyn alyp, jolyn kesý is-sharalaryn júzege asyrýǵa baǵyttalǵan. Munda turǵyndar ádettegideı taqyryptyq semınarlarǵa, «dóńgelek ústelderge» qatysý úshin emes, naqty máselelermen bólisip, pikir almasyp, keńes alý maqsatymen keletin bolady», dedi O. Bektenov.
О́ńir memlekettik qyzmet salasyndaǵy sybaılas jemqorlyq deńgeıi boıynsha elimizde tómen kórsetkishke ıe. Memlekettik qyzmet túrleriniń 83 prosenti halyqqa qyzmet kórsetý ortalyqtary arqyly jáne elektrondy túrde kórsetiledi. Memlekettik qyzmetshiler arasynda sybaılas jemqorlyqqa qarsy zańnama men ádep normalaryn saqtaý jóninde 370 túsindirý jumysy júrgizilgen.
Oblys ákimdigi men Memlekettik qyzmet isteri jáne sybaılas jemqorlyqqa qarsy is-qımyl agenttiginiń ókilderi «Qyzyljar – adaldyq alańy» jobasy aıasynda ózara yntymaqtastyq týraly memorandýmǵa qol qoıdy.
О́mir ESQALI,
«Egemen Qazaqstan»
Soltústik Qazaqstan oblysy