Kanadada ótip jatqan jastar arasyndaǵy álem birinshiliginiń tusaýkeser kezdesýinde Qazaqstannyń hokkeıshileri Fınlıandııa quramasynan oısyraı utyldy.
Qos komandanyń deńgeıi múlde bólek ekeni barshamyzǵa málim. Fınder bul jarysta 14 ret (4 altyn+4 kúmis+6 qola) júlde alǵan. Sońǵy ret olar 2016 jyly Helsınkıde ótken álem birinshiliginiń bas júldesin oljalaǵan bolatyn. Al Qazaqstan toǵyz jyldan keıin myqtylar tobyna endi ǵana oralyp otyr. Soǵan qaramastan bul oıynda bizdiń jigitter baryn saldy. Ásirese, qaqpashy Demd Eremeevtiń óneri kópshiliktiń kóńilinen shyqty. Ol Sýomı eli ókilderiniń qaqpaǵa baǵyttaǵan 51 soqqysyn keri qaıtardy. Keremet seıvter jasap, talaılarǵa tańdaı qaqtyrdy. Jasyratyny joq, Eremeev bolmaǵanda aıtýly kezdesý budan da iri eseppen aıaqtalatyn edi.
Birinshi kezeńde Otto Latvala (13-mınýt), Aarne Talvıtıe (15-mınýt) gol soqsa, úzilisten keıin Samýlı Vaınıonpıaıa (33-mınýt) mergendik tanytty. Úshinshi kezeńde Kaapo Kakko (47-mınýt) jáne Aleksı Heponıemı (49-mınýt) nysanany dál kózdedi. Qorytyndy esep 5:0.
Esterińizge sala keteıik, Kanadada ótip jatqan álem birinshiliginde Qazaqstannyń jastar quramasy mynadaı quramda óner kórsetýde. Qaqpashylar – Demıd Eremeev, Denıs Karataev («Snejnye Barsy»), Vladıslav Nýrek («Altaı Torpedo»). Qorǵaýshylar – Samat Danııar, Valerıı Orehov, Evgenıı Shınkareskıı, Ernar Musabaev, Artem Korolev, Davıd Muratov («Snejnye Barsy»), Iаroslav Hrıpkov («Altaı Torpedo»). Shabýylshylar – Saıan Danııar, Artýr Gatııatov, Davıd Makýskıı, Ivan Vereshagın, Aıdos Jorabek, Batyrlan Muratov, Oleg Boıko, Dıas Gýseınov, Maksım Mýsorov, Dmıtrıı Mıtenkov («Snejnye Barsy»), Andreı Býıalskıı, Rýslan Demın («Temırtaý»), Danıl Tretıakovskıı («Altaı Torpedo»).
Álem chempıonatynda 10 komanda bes-besten eki topqa bólinip, ózara kúsh synasýda «V» tobynda óner kórsetip jatqan jerlesterimiz búgin AQSh-qa qarsy oınaıdy. Al 30 jáne 31 jeltoqsanda Slovakııa jáne Shvesııamen sheberlik baıqasamyz.
Ǵalym SÚLEIMEN,
«Egemen Qazaqstan»