Qazaqstan aýylsharýashylyq ónimderimen ózin ózi qamtýǵa qabiletti. Elbasy ár Joldaýynda agroónerkásip keshenderin jańa tehnologııamen qamtý máselesin udaıy kóterip keledi.
Qyzylorda qalasynda salynyp jatqan alyp jylyjaıdyń qurylysy aıaqtalýǵa jaqyn qaldy. Tolyq avtomattandyrylǵan eki gektarda jylyna 900 tonna qyzanaq ósiriledi. Joba quny – 1 mlrd 100 mıllıon teńge. Onyń 650 mıllıon teńgesin Úkimet qoldaýymen aldy.
Seriktestik dırektory Ǵanı Almatov kompıýtermen basqarylatyn keshendegi qyzanaq kokos sýbstratyna otyrǵyzylatynyn aıtady. Munyń ekologııalyq jaǵdaıy halyqaralyq standarttarǵa negizdeledi. Máselen Qytaı jaǵy ekologııa, taýardyń sapasyna bas aýyrta bermeıdi. Jalǵa alǵan jerlerdi túrli hımıkattarmen az jylda kúlge aınaldyryp jiberetindikten de Reseıdiń Hakasııa úkimeti olardyń jylyjaılaryn jınap, elderine ketýine buıryq shyǵardy. О́zgeleri de yqylasty emes.
Al Qyzylordadaǵy jylyjaı jańa tehnologııa arqyly dúnıejúzilik tájirıbe negizinde jumys isteıdi. Merdiger kompanııanyń ókili, Ispanııadan kelgen Serhıo Molına jylý, jaryq, sýarý, salqyndatý sııaqty júıeler avtomatty túrde basqarylatyndyǵyn aıtady. Jumysshylarǵa qalǵany – daıyn ónimdi jınap, qoraptarǵa salý. Jańa tehnologııany bir kórgennen basqaryp ketý múmkin emes. Sondyqtan, Ispanııadan kelgen agronom bir jyl osy keshende jumys istep, jergilikti mamandardy úıretpek.
Qyzylordadaǵy baý-baqsha ónimderi kórshi Túrkistan oblysyna qaraǵanda qymbattaý bolyp kelgen. Endi osyndaı jylyjaılar oblystyń basqa aýdandarynda da salynatyndyqtan syrttan tasymaldanatyn kókónis baǵasy azaıady, baǵa tómendeıdi dep kútilýde. Jańa jumys oryndary kóbeıedi. Bir Shıeli aýdanynyń ózinde jıyrmaǵa jýyq jylyjaı boı kóteretinin eskersek, bul alynbaıtyn meje emes.
Baqtııar TAIJAN,
«Egemen Qazaqstan»
Qyzylorda oblysy