Qaraǵandy oblystyq tarıhı-ólketaný murajaıynda «Ýaqytqa saıahat» atty ınteraktıvti kórme kelýshilerge esik ashty. Bul jerde qala turǵyndary men qonaqtary, oqýshylar keńes zamany kezindegi saǵat jasaýshy áıgili zaýyttardyń ónimderin tamashalaı alady.
Bul is-shara óskeleń urpaqty ýaqyt ólshegish quraldardyń paıda bolýy jáne damýy týraly tereń tarıhymen tanystyrýdy, olardyń adam ómirindegi alar ornyn keńinen baıandaýdy maqsat etken.
– Kórmede Serdobskidegi «Maıak», Orlovtaǵy «Iаntar» saǵat zaýyttarynyń jáne basqa da kásiporyndardyń qabyrǵaǵa ilinetin, qolǵa taǵatyn saǵattaryn kórýge bolady, – deıdi murajaı dırektorynyń orynbasary Dáýren Júsipov.
Kórmedegi eń baǵaly degen jádigerdiń biri – peterborlyq Nıkolaı Lındenniń HIH ǵasyrda jasalǵan qabyrǵaǵa ilinetin saǵaty. Ataqty kópes 1888 jyly Nevsk dańǵylynda zergerlik buıymdar jáne saǵattardy jóndeıtin «Nıkolaı Lınden» dep atalǵan sheberhana ashqan.
Oqýshylar úshin murajaıdaǵy ınteraktıvti kórmeniń qyzyǵy mol bolmaq. Balalar munda kún, qum, sý jáne ot saǵattarynyń álemdegi eń alǵashqy maketterimen tanysa alady.
Sonymen qatar kórmede saǵat sheberiniń jumys bólmesi, ǵashyqtardyń kezdesetin jeri, saǵat mehanızminiń qurylymy sııaqty fotoaımaq-ınstallıasııa uıymdastyrylǵan.
Qaırat ÁBILDA,
«Egemen Qazaqstan»
QARAǴANDY