«Astana Opera» teatrynyń eýropalyq týrnesi úlken tabyspen Italııada óz máresine jetti. Ártister bir aı boıy horeografııalyq ónerdiń jaýhar týyndylary - P.Chaıkovskııdiń «Shelkýnchık» jáne «Aqqý kóli» baletterimen óner kórsetti. Osynaý aıtýly mádenı oqıǵa Ispanııa men Italııanyń jetekshi BAQ quraldarynda keńinen taratyldy. Spektaklderdi tamsana tamashalaǵan kórermen qaýym áleýmettik jelilerde 500-den astam pikir qaldyrǵan.
L’Eco jáne Liguria Notizie gazetiniń belgili jýrnalısi Klaýdıo Almansı bylaı dep jazǵan:
- Genýıada «Astana Opera» balet ártisteri klassıkalyq ónerdi baǵalaýshylardyń senimin tolyǵymen aqtap shyqty. Karlo Felıche teatrynda «Shelkýnchık» baleti úzdik deńgeıde usynylǵan bolatyn, bul - elordalyq trýppanyń naǵyz jetistigi boldy. Kórermenge naǵyz sıqyrǵa toly ǵajaıyp kesh syıǵa tartyldy. Kópshilik qaýym áıgili óner maıtalmany Iýrıı Grıgorovıchtiń tamasha qoıylymyn, keremet horeografııasynyń tartymdy qııalyn bar yntasymen tamashalady. Eń joǵarǵy deńgeıde 36 balet sheberinen turatyn basty partııa oryndaýshylary men kordebalet ártisterine jáne balet trýppasynyń kórkemdik jetekshisi Altynaı Asylmuratovaǵa jalyndy qoshemetimizdi bildiremiz. «Astana Opera» teatry tek 2013 jyly ǵana qurylǵanyna qaramastan, az ýaqyt ishinde halyqaralyq deńgeıde kópshilikke belgili ári tanymal teatrlardyń birine aınaldy.
Italıandyqtar men ıspandyqtar áleýmettik jelilerde tolassyz pikir bildirip jatty. Mysalǵa, qazaqstandyq trýppany súıip tamashalaıtyn Gabriella Cavallaro turaqty túrde «Astana Opera» ártisteriniń óneri týraly pikirler men túsinikter jazady: Minsiz oryndaý, sırek kezdesetin biregeı óner! Quttyqtaımyz! Biz 13 qańtarda ótetin spektaklge taǵy kelemiz... Barlyǵy keremet bolady dep oılaımyn, astanalyq trýppa - ǵajap (- Parole sante! Una esecuzione perfetta, una arte rara, unica! Complimenti! Ci saremo il 13 ....penso sia bellissimo la compagnia di Astana sono bravissimi)!
Valensııada (Italııa) Altynaı Asylmuratovanyń qoıylymyndaǵy P.Chaıkovskııdiń «Aqqý kóli» spektakli týraly News4europe.eu, Valenciaplaza.com, Efe.com, Micuenta.levante-emv.com, Elperiodicodeaqui.com, Premsavalenciana.es aqparattyq agenttikteriniń jýrnalısteri jáne t.b. qyzyqty pikirler jazdy.
- Bas partııalardyń oryndaýshylary Áıgerim Beketaeva (Odetta – Odıllııa), Oljas Tarlanov (hanzada Zıgfrıd) pen Serik Naqyspekov (Shýt) jurtshylyqtyń nazaryn ózderine aýdardy. Serik Naqyspekov keremet aplomb ádisin pash etti, alaıda kórermen qaýymdy ártistiń júzindegi kúlimsiregen jylylyqty saqtaı otyryp, kóptegen kúrdeli pırýet jasaý qabileti tańǵaldyrdy. Suńǵaq ta symbatty Áıgerim Beketaeva men Oljas Tarlanov túrli sezimder gammasyn tamasha jetkizdi, sóıtip, qazaq balet mektebi – tek klassıkalyq bı tehnıkasyn meńgerý ǵana emes, sondaı-aq óz partııasyn akterlik turǵydan alyp shyǵý sheberligi ekendigi belgili boldy. Dırıjer Arman Orazǵalıev orkestrge keremet jetekshilik etti: mýzykanttardyń oınaýy óte ádemi boldy, - deıdi Efe AA jýrnalısi.
Penades Neves esimdi kórermen premeradan soń áleýmettik jelige osy baletti kún saıyn kóre bergisi keletindigin jazdy (Penades Nieves: Espectacular! La vería todos los días!).
«Aqqý kóli» spektakliniń sońǵy bes qoıylymyn qazaqstandyq ártister Italııada kórsetti. Munda balet trýppasyn asyǵa kútkendigin aıtpasa da túsinikti. Barlyq keshke bıletter satylymǵa túsken sátten-aq satylyp ketken. Balet óneriniń jaýharyn tamashalaýǵa ıtalıandyqtar Genýıaǵa kórshiles qalalardan keldi.
Ártister Qazaqstanǵa 14 qańtarda qaıtyp oralady, olar shamaly sharshaǵandarymen, shetelde elimizdi tıisti deńgeıde kórsete bilgenderi úshin baqytty.
Eske salar bolsaq, eýropalyq gastrol 2018 jyldyń qarasha aıynda A.Jubanov pen L.Hamıdıdiń ulttyq jaýhary – «Abaı» operasyn oryndaýmen bastalyp, Italııa men Ispanııadaǵy balet spektaklderimen jalǵasyn tapqan edi.
Gastrol «Rýhanı jańǵyrý» baǵdarlamasy aıasynda QR Mádenıet jáne sport mınıstrliginiń qoldaýymen ótti.