Shyraıly Shymkent qalasynyń elimizdegi Astana, Almaty syndy iri qalalardyń qataryna qosylǵanyna jeti aı boldy. Osy ýaqyt aralyǵynda qandaı tyndyrymdy ister atqaryldy? Qazirgi jaǵdaı men aldaǵy jobalarǵa syn kózben qarap, azamattyq qyzyǵýshylyqpen osy jaıttardy qysqasha zerdeleýge kiristik. Tereńge boılamaı, kópshiliktiń kózine túsip, kókeıinde júrgen jaǵdaıattarǵa barynsha ekpin berýdi mejeledik.
Sonymen, Memleket basshysynyń 2018 jylǵy 19 maýsymdaǵy tarıhı Jarlyǵynan keıin burynǵy Ońtústik Qazaqstan oblysynyń ákimshilik ortalyǵy sanalǵan Shymkent shahary ózindik damý baǵytyn aıqyndap, qyzý jumysqa kiristi. Mundaǵy maqsat – qalanyń qalyptasqan ereksheligin saqtap, turǵyndar men qala qonaqtaryna jaǵdaı jasaýǵa baǵyttaldy. Qala bıligine jergilikti problemalarǵa ózge qyrynan qaraı alatyn zamanaýı menedjerler keldi. Bul turǵyda jergilikti kadrlardyń potensıaly erekshe eskerildi. Az ǵana ýaqyt aralyǵynda shaǵyn ári yqsham memlekettik basqarý apparaty qaıta jasaqtaldy. Birqatar salanyń tizginin shet elde bilim alǵan bilikti mamandar ustady. Minsiz eńbek etken jergilikti mamandardyń da tájirıbesine mán berildi.
Aldymen qala aýmaǵyndaǵy kásiptiń kózin tapqan kásipkerler men kásipkerlik nysandardyń qyzmeti tııanaqty saralandy. Shymkenttiń elimizdegi iri kásipkerlik ortalyǵyna aınaldyrýǵa aıryqsha basymdyq berildi. Jeltoqsanda ótken halyqaralyq ınvestısııalyq forýmǵa Germanııa, Danııa, Kanada, Ońtústik Koreıa, Birikken Arab Ámirlikteri syndy ekonomıkalyq salada kósh ilgeri 20 elden belgili kompanııalardyń jetekshileri keldi. Nátıjesinde 200 mln AQSh dollaryn quraıtyn 11 memorandýmǵa qol qoıyldy. Atap aıtqanda, qalanyń soltústik aýmaǵynda boı túzep jatqan zamanaýı «Shymkent Sıtı» aýdany aýmaǵyna salynatyn turǵyn úı keshenderi men ákimshilik ǵımarattardyń qurylysyna, «Jedel járdem» qyzmeti parkin jańǵyrtýǵa, mıkrofıbra óndiretin toqyma fabrıkasyna, ortalyq stadıondy qaıta jańartýǵa jáne t.b. jobalarǵa ınvestorlardyń áleýeti jumyldyryldy. Al bul bastamalardyń shapaǵatyn qala turǵyndary aldaǵy jyldary kóretin bolady.
Bıyl qoǵamdyq kólik parkin jańalaý úshin ekologııalyq hám ekonomıkalyq turǵyda tıimdi ári turǵyndardy tasymaldaýǵa yńǵaıly jańa myń avtobýs alynady. Qala bıliginiń jolaýshylarǵa jaǵdaı jasaýdy kózdegen bul sheshimi kóp uzamaı jemisin bere bastady. Avtobýstardyń aldy ótken jyly-aq jetkizilip, qala shetindegi eldi mekender men qala ortalyǵyndaǵy baılanys nyǵaıdy. Bir sózben aıtqanda, shahar syrtyndaǵy «Ulaǵat», «Aqjar», «Shapyrashty» syndy shaǵynaýdandar men turǵyn úı alaptaryndaǵy turǵyndarynyń qala ortalyǵyna kelip-ketýi oń sheshildi. Qoǵamdyq kólikterdiń áleýmettik baǵyttary aıqyndaldy. Jumys tártibi men tazalyqqa jiti mán berildi.
Qala aýmaǵyndaǵy qaýipsizdik is-sharalaryn barynsha jetildirý maqsatynda bıyl qala aýmaǵyna 50 myń beınekamera ornatý josparlanýda. Osylaısha, Shymkent elimizdegi eń qaýipsiz qalaǵa aınalmaq. Sıfrlandyrýǵa basymdyq berilip, «Shymcard» júıesi qoldanysqa enbek. Endi qala turǵyndary bir kartamen qalaǵan qyzmetter men servısterge tólem jasaı alady.
Búginde qala bıligi shymkenttikterdiń turmysyn jaqsartý, jańa jumys oryndaryn ashý, turǵyndarǵa qolaıly jaǵdaı jasaý úshin josparly jumys isteýde.
Halyqtyń kóńilinen shyqqan ilkimdi jobalar ákimdik tarapynan árdaıym jetildirilip otyrmaq. «Arbat» sekildi nysandardy kóbeıtý, halyq tynyǵatyn, serýendeıtin, zamanaýı demalys oryndaryn ashý, kópqabatty ári jaıly turǵyn úıler salý turaqty nazarda bolmaq. Bul baǵyttaǵy iri jobalardy qarjylandyrý maqsatynda sheteldik ınvestorlarmen kelissózder júrip jatyr.
Qaladaǵy iri kásiporyndar men orta jáne shaǵyn kásipkerlik nysandardyń jalpy, eńbekqor shymkenttikterdiń tabysty qyzmetiniń nátıjesinde Shymkent 2025 jyly ózin-ózi tolyq qamtamasyz etetin deńgeıge jetedi. Bul - Ulttyq ekonomıka mınıstrliginiń boljamy.
Turǵyndardyń ómir sapasy men mádenıetin jaqsartý búgingi qala tizginin ustaǵan basshylarǵa júktelgen negizgi mindetterdiń biri. Osylaısha, aýqymdy jobalardy iske asyrýdy kózdep otyrǵan shymkenttikter ózderi týraly qoǵamda qalyptasqan keıbir jaǵymsyz stereotıpterdi joıý arqyly Shymkentti trendten brendke aınaldyrýdy kózdep otyr. Jýyrda júrgizilgen «Shymkent – meniń qalam» onlaın saýalnamasyna qatysqandardyń 82 paıyzy Shymkentti damytýǵa úles qosýdy azamattyq mindetim dep sanaıtynyn jetkizgen. Bul - bizdiń pikirimizge dálel bolary sózsiz.
Beken QONYS