Túrkistanda arnaıy ekonomıkalyq aımaq aǵymdaǵy jyly iske qosylady. Bul týraly qalalyq kásipkerlik bóliminiń basshylyǵy málimdedi.
Túrkistan qalalyq kásipkerlik bóliminiń basshysy Gúljamal Mahanova AEA Túrkistandaǵy ındýstrıaldy aımaq janyna ornalastyrylatynyn atap ótti. Onyń sózine qaraǵanda, aǵymdaǵy jyldyń úshinshi toqsanynan bastap aımaqta jobalardy ornalastyrý jumystary júrgiziledi. Aýmaǵy 400 gektar bolatyn jerge bolashaqta 200 jobany ornalastyrý josparlanǵan. Búginde jerdiń qujattandyrýdy qalalyq kásipkerlik bólimi júrgizip jatyr.
Jaqyn arada ınfraqurylym júıelerin tartý jumystary bastalady. Jobalardy iriktep, olardyń júzege asýyn arnaıy ekonomıkalyq aımaq dıreksııasy qamtamasyz etetin bolady.
«Qazir ındýstrıaldy aımaqqa barlyq ınfraqurylym júıeleri tartylyp qoıǵan. Endi sol ınfraqurylymnyń barlyǵyn arnaıy ekonomıkalyq aımaqqa qaraı sozamyz. Ol jerge sý, jaryq, gaz - barlyǵy jetkiziledi», - deıdi qalalyq kásipkerlik bóliminiń basshysy.
Al arnaıy ekonomıkalyq aımaqta júzege asatyn jobalar memleket tarapynan jeti birdeı jeńildikke ıe bolady dep kútilýde. Atap aıtqanda, osy jerdegi jobalardy júzege asyrýǵa qajetti shetten ákelingen zattardan kedendik qun salyǵy ustalmaıdy. Sonymen qatar kásipkerler 10 jylǵa deıin jerdi tegin paıdalanady. Al kommýnaldyq tarıfter quny 35 paıyzǵa deıin jeńildetilmek. Oblys ortalyǵyndaǵy óndiristi órkendetetin aımaqty tezdetip iske qosý úshin búginde qala jáne oblys bıligi tıisti jumystardy atqaryp jatyr.