Úkimet otyrysynda sóz alǵan Dáýren Abaev BUU júrgizetin memleketterdegi elektrondy úkimettiń damý reıtıngisinde elimiz 39-orynda ekenin habarlady.
Aqparat jáne kommýnıkasııa mınıstriniń málimdeýinshe, elimiz bul tizimdegi damyǵan memleketter qatarynda bar.
«Sıfrly Qazaqstan» memlekettik baǵdarlamasy aıasynda elektrondy úkimetti jańa e-Gov 3.0 satysyna kóshirý josparlanǵan. Bul saty Ońtústik Koreıa, Aýstralııa, Sıngapýr, Ulybrıtanııa, Danııa jáne Shvesııa sııaqty birqatar ozyq memlekette qoldanysqa ıe.
e-Gov 3.0 satysy «jasandy ıntellekt», «proaktıvti qyzmetter», «sıfrlanǵan ómir belesteri» syndy elementterdi engizý arqyly júzege asady. Mınıstr Dáýren Abaevtyń aıtýynsha, elimiz 2021 jyly tolyqtaı jańa satyǵa kóship úlgeredi. Qazirgi tańda «Smart Brıdj» jobasy aıasynda jasandy ıntellekttiń elementterin engizý, proaktıvti qyzmetter kórsetý sharalary júzege asyp jatyr.