«Qazaq Epos» respýblıkalyq aǵartý jobasy 6-10 synyp oqýshylary arasynda «Tulpar minip, tý alǵan!» baıqaýyn jarııalady. Joba aıasynda 107 betten turatyn «Qobylandy batyr» jyryn 50 000 oqýshyǵa tolyq jattatý kózdelgen.
«Bul joba memleket basshysynyń «Uly dalanyń jeti qyry» atty maqalasymen de, bıylǵy Jastar jylymen de tyǵyz baılanysty. Basty maqsat – oqýshylardy rýhanı adamgershilik qyrynan damytý men qazaq halqynyń «Alpamys», «Er Tarǵyn», «Qobylandy» jáne t.b. epostary arqyly qazaq halqynyń baı etno-mádenı jáne fılosofııalyq murasy negizinde tárbıeleý bolmaq», - dep málimdedi Aqparat jáne kommýnıkasııalar mınıstri Dáýren Abaev.
Baıqaý respýblıka boıynsha 5 000 mektepten 50 000 oqýshy men 25 000 muǵalimdi qamtıdy.
«Negizgi baǵyt - tarıhı epostardy jattaý. Týyndyny tolyq jatqa aıtý, mánerlep oqý, epostaǵy ár sózdiń maǵynasy men mazmunyn túsiný basty talaptardyń biri. Poetıkalyq teksti meńgerý arqyly oqýshy tarıhty da tereń túsine bastaıdy. Sondaı-aq, este qalatyn poetıkalyq mátin oqýshynyń sóıleý mádenıetin, saýatty jazýyn qalyptastyrady. Osylaısha, ádebı shyǵarmalardy talǵammen tańdaýyna negiz qalaıdy. Sonymen qatar, bul jobanyń «Rýhanı jańǵyrý» baǵdarlamasynda aıtylǵan ulttyq kodty qalyptastyrý úshin de yqpaly zor bolmaq», - dedi Aqparat jáne kommýnıkasııalar mınıstri.
Joba aýdandyq, oblystyq, respýblıkalyq 3 kezeńnen turady. Oqýshylarǵa arnalǵan júlde qory boıynsha aýdandyq kezeńde 1-oryn úshin 150 000 teńge, 2-oryn 100 000 teńge, 3-oryn 50 000 teńge, al oblystyq kezeńde 1-oryn úshin 1 000 000 teńge, 2-oryn 600 000 teńge, 3-oryn 300 000 teńge syıaqy beriledi.
Sondaı-aq, oblystyq kezeńde jeńimpaz atanǵan oqýshylardyń muǵalimderine de aqshalaı júlde qory eskerilgen.
«Joba elimizdiń 6-10 synyp oqýshylary arasynda ótedi. Qatysýshylar «Qobylandy batyr» jyryn jatqa aıtyp, jyrdyń ishindegi kónergen, tarıhı sózderdiń maǵynasyn ashyp, "Qazaq ádebıeti" oqýlyǵy boıynsha ázirlengen suraqtarǵa jaýap beredi. Sonldaı-aq, aldyn ala buqaralyq aqparat quraldarynda jarııalanǵan taqyryptar boıynsha esse jazady», - dep atap ótti Dáýren Abaev.
Aıta ketsek, joba Qazaqstan Respýblıkasy Aqparat jáne kommýnıkasııalar mınıstrligi men «Qazaq Epos» qoǵamdyq qorynyń bastamasymen, sondaı-aq, Qazaqstan Respýblıkasynyń Bilim jáne ǵylym mınıstrligi, «Habar» Agenttigi jáne jergilikti atqarýshy organdardyń qoldaýymen júzege asyrylady.