О́ńir kásipkerleri un ónimderin shetelge eksporttaı almaýdyń saldarynan tyǵyryqqa tirelip otyrǵan jaıy bar.
Basty sebebi, unǵa qaraǵanda, qazir bıdaıdyń baǵasy áldeqaıda qymbat. Onyń ústine О́zbekstan bıdaıdy Qazaqstannan satyp alyp, ózderinde óńdegendikten, unnyń baǵasy tómendep ketken.
Un úgý kombınatynyń kommersııalyq máseleler jónindegi dırektory Taısııa Kolegovanyń aıtýyna qaraǵanda, buryndary júk vagondarynyń tapshylyǵy qatty sezilse, búginde qańtarýly tur. Sońǵy ónimder Reseıge jóneltilýde.
«Astyqtyń bir tonnasy – 70 myń teńge. Ony óńdep,shetelge jiberý tıimsiz. Jaǵdaı bulaı jalǵasa berse, ishki naryqta shıkizat jetpeı qalýy múmkin. Onyń aqyry kásiporyndardyń toqyraýyna ákelip soqtyrady», deıdi ol. Dıirmende jumys istegen 50 jumysshy túrli naýqandyq sharýalarǵa tartylǵan.
Tyǵyryqqa tirelgen orta jáne shaǵyn bıznes ókilderi Aýyl sharýashylyǵy jáne Ulttyq ekonomıka mınıstrlikterine hat jazyp, kómek qolyn sozýdy ótinip otyr.
Saly sýǵa ketken un úgý kombınatynyń dırektory Isa Allahıarovtyń barmaǵan jeri, ashpaǵan esigi joq kórinedi. 2017 jyly 38 myń tonna ónim shyǵarylsa, byltyrǵy kórsetkish 17 myń tonna ǵana. О́ndiris kólemi birden eki esege quldyraǵan. Ol bıdaıǵa baj salyǵyn kóterý kerek. Osy másele Úkimet tarapynan sheshilse, baǵa saıasaty retteler edi, deıdi.
Basty tutynýshy sanalatyn Aýǵanstan negizinen О́zbekstannyń arzan unyn satyp alady eken. Sońǵy jyldary ala taqııaly aǵaıyndar dıirmen keshenderin kóptep salyp, básekelestikti kúrt arttyryp jibergen. Buryndary elimiz tek Tájikstanǵa 700 myń tonnaǵa deıin un eksporttap kelgen.
Oblystyq aýyl sharýashylyǵy basqarmasy basshysynyń orynbasary Qýandyq Shakýbaev osy salada jumys isteıtin kásipkerlerge qoldaý kórsetý qajettigin alǵa tartady. Onyń oıynsha temirjol tasymaly men óńdeý kásiporyndarynyń shyǵynyn jabý úshin sýbsıdııa berilýi kerek.
Ázirge sóz kóp, nátıje joq. Qazirgi tańda Qazaqstanda 250-den astam dıirmen kesheni bar. Jaǵdaı rettelmese, árbir tórtinshi kásiporyn óz jumysyn toqtatýy yqtımal.
О́mir ESQALI,
«Egemen Qazaqstan»
Soltústik Qazaqstan oblysy