Búgin «BJZQ» AQ salymshylar men alýshylarǵa aqparat berý jónindegi atqarylǵan jumystar týraly habarlady.
Biryńǵaı jınaqtaýshy zeınetaqy qorynyń salymshylary men alýshylary jeke zeınetaqy shotynan úzindi kóshirmeni kez kelgen ýaqytta (elektrondyq tásilmen) tegin alýǵa quqyly. Bul zań júzinde bekitilgen.
Alǵashqy jyldary salymshylar men alýshylardyń kópshiligi zeınetaqymen qamsyzdandyrý týraly shart jasasý barysynda shottan anyqtama alý tásili retinde poshta baılanysyn tańdaǵan bolatyn. Bul rette zeınetaqy shotynan úzindi kóshirme salymshylar men alýshylarǵa jylyna bir ret jiberiledi. Al poshtalyq mekenjaı ózgergen jaǵdaıda, bul týraly Qorǵa mindetti túrde habarlaý qajet. Eger habar berilmese, BJZQ budan keıin zeınetaqy jınaqtary týraly anyqtamany jibermeýge quqyly. Sonymen qatar shottarynda aqsha joq salymshylar men alýshylarǵa úzindi kóshirme jiberilmeıdi.
Búgingi tańda zeınetaqy jınaqtarynyń jaı-kúıi týraly anyqtamany mynadaı tásildermen alýǵa bolady:
BJZQ-ǵa tikeleı kelip ótinish berý; elektrondyq tásil, onyń ishinde:– úzindi kóshirme BJZQ-ǵa usynylǵan elektrondyq meken-jaıǵa jiberiledi. Salymshy, ıakı alýshy tańdap alynǵan kestege sáıkes zeınetaqy shotynan úzindi kóshirmeni: aı saıyn, úsh aı saıyn, jarty jylda bir ret nemese jyl saıyn alady;
– logın men parol (qupııa sóz) nemese elektrondyq sıfrlyq qoltańbanyń kómegimen, Qor saıtynyń Jeke kabıneti arqyly;
– elektrondyq úkimet portalynyń Jeke kabıneti nemese bir rettik sms-parol arqyly, munda sms-parol mGov mobıldi azamattar bazasynda tirkelgen salymshylar men alýshylardyń uıaly telefonyna jiberiledi;
dástúrli poshta baılanysy arqyly.Aqparat alý tásilin tańdaý úshin salymshy (alýshy) jeke basyn kýálandyratyn qujatpen BJZQ keńsesine keledi. Elektrondyq sıfrlyq qoltańba bolǵan jaǵdaıda, aqparat alý tásilin Qor saıtynyń Jeke kabınetinde tańdaýǵa nemese ózgertýge bolady.
Jeke zeınetaqy shotynyń jaı-kúıi týraly anyqtamany elektrondyq poshta arqyly alý tásilin 800 myńnan astam salymshy (alýshy) tańdaǵan. 2018 jyly olarǵa shamamen 5,6 mln habarlama jiberilgen.
2019 jyldyń 1 qańtaryna qaraı 5,2 mln adam zeınetaqy shotynyń jaı-kúıi týraly anyqtamany Qordyń enpf.kz saıtynyń Jeke kabıneti arqyly alý múmkindigine ıe.
Bir jyl ishinde ınternet-habarlandyrý tásilin tańdaǵandar sany 1,2 mln jýyq adamǵa kóbeıdi. Bul tásil shynynda da óte yńǵaıly: zeınetaqy shotynyń jaı-kúıi týraly anyqtamany kez kelgen jerde aptasyna 7 kún, táýligine 24 saǵat boıy jedel túrde alyp turýǵa bolady.
2019 jyldyń qańtar-aqpan aılarynda Qor 2019 jyldyń 1 qańtaryna qaraı zeınetaqy jınaqtarynyń jaı-kúıi týraly 1 mıllıonǵa jýyq anyqtamany salymshylar men alýshylarǵa jiberý sharasyn júzege asyrdy. Iаǵnı, BJZQ jyl basynan beri 2018 jyldyń qorytyndysy boıynsha salymshylarǵa (alýshylarǵa) aqparat berý sharasyn júrgizip jatyr.
Aıta ketelik, úzindi kóshirmeni Qor keńsesine kelip alý tásilin 1,8 mln astam adam tańdaǵan.
Aınash ESALI,
«Egemen Qazaqstan»
ALMATY