Kórkem gımnastıkadan Qazaqstan komandasynyń bas bapkeri Álııa Iýsýpova Olympic.kz saıtyna suhbat berip, sportshylardyń jańa maýsymdaǵy aıaq alysyn baǵamdady. Bas bapkerdiń aıtýynsha, gımnastarymyz úshin jyl basyndaǵy týrnırler jaman bastalǵan joq.
- Eresekter men jasóspirimder úshin bıylǵy maýsymdaǵy alǵashqy resmı jarystar bastaldy. Ulttyq qurama úzdigi Alına Ádilhanova Máskeýde ótken iri týrnır – Gran-prı básekesinde baq synady. Iá, Alına úshin jarys qıyndaý ótti. О́ıtkeni, ol syrqattanyp qalýyna baılanysty Astanadaǵy synǵa qatyspaǵan bolatyn. Sol sebepti, Máskeýdegi týrnırde ol tolyǵymen babynda bolǵan joq.
Jalpy, jalǵyz Ádilhanova ǵana emes, komandadaǵy barlyq sportshylar áli babynda emes. Jyldyń basy bolǵandyqtan, sporttyq formaǵa enýge áli biraz ýaqyt qajet. Bizdiń bıylǵy maýsymdaǵy basty maqsatymyz – qyrkúıekte ótetin lısenzııalyq álem chempıonaty men maýsym aıynda Taılandta jalaýy jelbireıtin Azııa birinshiliginde sátti óner kórsetý. Atalǵan týrnırlerge deıin gımnastarymyz áli ysylatyny anyq.
Qazir sportshylarǵa qoıylǵan negizgi talap – jańa baǵdarlamany tolyǵymen meńgerip, turaqty túrde óner kórsetý. Bıyl bizdiń sportta azdaǵan ózgerister bar. Naqtylap aıtar bolsam, jattyǵý quraldarymen jumys isteý burynǵydan da qıyndaı tústi. Eger bıylǵy týrnırlerdi kórgen bolsańyzdar, muny birden baıqaýǵa bolady. О́tken jylǵymen salystyrǵanda jattyǵý áldeqaıda aýyrlaǵan.
Sol sebepti, Alına bastaǵan gımnastarymyz azdap qatelikke boı aldyrýda. Degenmen, taǵy da qaıtalap aıtamyn, bul jyldyń basy. Ýaqyt óte kele bul kemshilikterdi joıamyz. Bir aptadan soń Ádilhanova Ispanııada ótetin Gran-prı kezeńine qatysady. Barshańyzdy sportshylarymyzǵa jankúıer bolýǵa shaqyramyn, - dedi Álııa Iýsýpova.
Eske sala keteıik, Alına Ádilhanova Máskeýdegi Gran-prı kezeńinde kópsaıys qorytyndysy boıynsha 19-shy oryn ıelendi.