Senatta Qarjy jáne bıýdjet komıteti elimizdegi memlekettik-jekeshelik áriptestikti damytý máseleleri boıynsha memlekettik jáne jergilikti múddeli atqarýshy organdarmen ótkizetin kezdesý ótti.
Parlament Senaty komıtetiniń tóraǵasy Olga Perepechına sharany asha kelip, Elbasy «Qazaqstannyń úshinshi jańǵyrýy: jahandyq básekege qabilettilik» Qazaqstan halqyna Joldaýynda memlekettik-jekeshelik áriptestikti keńeıtý kásipkerlikti damytýǵa arnalǵan aýqymdy áleýet ári ınfraqurylymdy damytýdyń negizgi tetigi bolýy tıis ekenin atap ótkenin eske saldy. Sonymen birge, memlekettik-jekeshelik áriptestik jobalaryn iske asyrý bıýdjet aýyrtpalyǵyn tómendetýi, jobalardyń sapasyn arttyrýy, bıznesti damytýǵa jáne memleket ekonomıkasyna ınvestısııa tartýy tıis.
Ol sondaı-aq shyn máninde bıýdjet shyǵyndary jeńildemeıtinin aıta kelip, jobalardyń kóptigi men orta merzimdi bolýyna baılanysty bıýdjet júktemesiniń kúrt ósýi yqtımaldyǵyn atap ótti. Keıbir jobalar neǵurlym qymbatqa túsip otyr, bank paıyzy, operasııalyq, ınvestısııalyq jáne bıýdjet ınvestısııasy barysynda bolmaıtyn ózge de shyǵystar esep-qısapqa qosylady, memlekettik jáne jeke áriptester arasyndaǵy mindettemelerdi ózara tıimdi bólýde teńgerim qaǵıdasy saqtalmaıdy.
Ulttyq ekonomıka mınıstri birinshi orynbasary Rýslan Dálenov Qazaqstandaǵy memlekettik-jekeshelik áriptestiktiń damýyndaǵy negizgi kórsetkishtermen tanystyrdy. 2019 jylǵy 1 aqpandaǵy jaǵdaı boıynsha jalpy somasy 1,4 trıllıon teńge bolatyn 558 memlekettik-jekeshelik áriptestik kelisim-shart jasaldy.
Qaraǵandy oblysy ákiminiń orynbasary Almas Aıdarov aımaqtaǵy memlekettik-jekeshelik áriptestiktiń ózekti máseleleri men keleshegi týraly esep bere kelip, memlekettik-jekeshelik áriptestik barysynda jergilikti jobalardy josparlaý men iske asyrýdyń jekelegen rásimderin retteýde týyndaıtyn olqylyqtarǵa toqtaldy. Sondaı-aq, Túrkistan oblysy ákiminiń orynbasary Tólegen Sársembaev, Almaty qalasy ákiminiń keńesshisi Rabandııar Maımaqov, «Shyǵys Qazaqstan oblysy memlekettik-jekeshelik áriptestik óńirlik ortalyǵynyń» basqarma tóraǵasy Shákárim Buqtyǵutov sóz sóıledi.
Kezdesý qorytyndysy boıynsha ázirlengen usynystarǵa taldaý jasalyp, qajettiligine oraı Úkimetke jiberiledi, sondaı-aq zań shyǵarý jumystary barysynda eskeriletin bolady.