Bolgarııanyń Sofııa qalasynda bokstan «Strandja» halyqaralyq týrnıri aıaqtaldy. О́kinishke qaraı, fınalǵa joldama alǵan bes qazaqstandyq boksshy kúmis medalmen shekteldi dep habarlaıdy Olympic.kz.
49 kelidegi Temirtas Júsipov úndistandyq Amıtten 0:5 esebimen utyldy.
60 kelidegi Zákir Safıýllın Reseı boksshysy Artýr Sýhbankýlovqa ese jiberdi. Reseılik boksshy 4:1 esebimen jeńiske jetken.
64 kelidegi Sanatáli Toltaev pen reseılik Alekseı Mazýr arasyndaǵy tartysty jekpe-jek 3:2 esebimen qarsylastyń paıdasyna sheshildi.
69 kelidegi Abylaıhan Júsipov jartylaı fınalda alǵan jaraqatyna baılanysty aqtyq synǵa shyqqan joq. Osylaısha, avtomatty túrde kúmis medal ıelendi.
91 kelidegi Vasılıı Levıt reseılik Sadam Magomedovke 1:4 esebimen jol berdi.
Osylaısha, Qazaqstan komandasy Bolgarııadaǵy týrnırge negizgi qurammen qatysyp, bes kúmis oljalap otyr.