S.Seıfýllın atyndaǵy QazATÝ Parıjde álemdegi eń úzdik 10 agrarlyq JOO-nyń qataryna kiretin AgriParisTech ýnıversıtetimen yntymaqtastyq týraly memorandýmǵa qol jetkizdi.
Osy oqıǵaǵa oraı ýnıversıtet rektory Aqylbek Kúrishbaev: «Budan bylaı fransııalyq professorlarmen halyqaralyq deńgeıdegi jańa oqý baǵdarlamalaryn birlese ázirlep, bilim berý úderisine engizetin bolamyz. Barlyǵy josparlaǵanymyzdaı bolsa, aldaǵy ýaqytta olarmen qos dıplomdy bilim berýge kóshemiz. Mundaı mindetti aldymyzǵa Premer-Mınıstrdiń orynbasary – Aýyl sharýashylyǵy mınıstri О́.Shókeev, Ulttyq agrarlyq ǵylymı-bilim berý ortalyǵynyń basshylyǵy qoıyp otyr. Bizge aýyl sharýashylyǵy baǵytynda bilim beretin álemdik kóshbasshynyń kelýin tyń ózgeristerge jasalǵan alǵashqy qadamnyń basy dep baǵalaǵan jón», dedi.
Rektordyń aıtýynsha, bul sheshimdi fransııalyq ýnıversıtet qazaqstandyq joǵary oqý ornynyń oqytýshylary men stýdentteriniń áleýetin jan-jaqty zerttep baryp qabyldaǵan. Mundaı kóshbasshylarmen seriktestikke qol jetkizý de ońaı emes, sebebi bul ýnıversıtetter úshin ózderiniń jeke ımıdji birinshi orynda.
– Endigi kezekte QazATÝ-dyń damý baǵdarlamasyn tabysty ári ýaqytyly júzege asyrý úshin memlekettik bıýdjetten qarajat bólý qajet. Aldaǵy ýaqytta biz de álemniń úzdik ýnıversıtetterindegi sııaqty aýyl sharýashylyǵynyń kásibı mamandaryn daıyndaımyz. О́ıtkeni biz kezindegi Sıngapýr, Malaızııa, Argentına, Chılı, Qytaı jáne basqa da elderdiń jetekshi ýnıversıtetteri ótken jolmen júrip kelemiz. Olardyń qalyptasýyna memleket tarapynan qoldaý kórsetilip, sonyń nátıjesinde qazirgi deńgeıge jetip otyr, – deıdi A.Kúrishbaev.
Arnur ASQAR,
«Egemen Qazaqstan»