Qaraǵandyda adam kóp jınalatyn jerlerde, sonymen qatar shetkerirek ornalasqan shaǵyn aýdandarda búıirinde «Jumysqa ornalastyrý boıynsha mobıldi pýnkt» degen jazýy bar arnaıy avtokólikter paıda boldy.
Olar bir tereze qaǵıdasy boıynsha jumys isteıdi, bul jerde jumysqa ornalasýǵa, kásiptik oqýǵa, óz isin ashý jáne damytý úshin shaǵyn nesıe alý boıynsha túrli aqyl-keńes alýǵa bolady. Tek sońǵy aıdyń ishinde 1000-nan astam adam osy mobıldi toptardyń kómegine júgingen.
– Arnaıy jabdyqtalǵan avtokólik keste boıynsha jumys isteıdi. Biz ony áleýmettik jelilerde, qalalyq jumyspen qamtý ortalyǵynyń akkaýnttarynda jarııalaımyz. Osyǵan uqsas mobıldi pýnktter jaqyn arada oblystyń barlyq qalalary men aýdandarynda paıda bolady, – deıdi jumyspen qamtýdy úılestirý jáne áleýmettik baǵdarlamalar bóliminiń basshysy Muhtar Tóleı.
Jyljymaly pýnktterdiń nátıjeli jumys isteı bastaǵanyn aıta ketken jón. Mysaly, joba bastalǵan alǵashqy kúni Qaraǵandynyń qaq ortasyndaǵy 45 oramda túske deıingi ýaqyttyń ózinde 80 adam mobıldi toptyń kómegine júginip, jumyspen qamtý ortalyǵy mamandarynyń keńesin aldy. Sonyń nátıjesinde 15 adam turaqty jumysqa ornalasýǵa joldama alyp, 10 adam kásiptik tegin oqý kýrsyna jazyldy. Sonymen qatar, 30-dan astam adam tolyq keńes alyp, aldaǵy ýaqytta memlekettik baǵdarlamalarǵa qatysýǵa tilek bildirgen.
Jalpy, qaraǵandylyqtar mundaı pýnktterdiń paıda bolýy óte jaqsy ıdeıa dep sanaıdy.
– Jumysqa ornalasý pýnktin kórip, qandaı jumystar baryn bilip shyǵaıyn dep sheshtim. Men burynnan beri ózime qosymsha tabys kózin izdep júrgen edim. Maǵan munda bárin túsindirdi, qaıda barý kerektigin aıtty. Meniń oıymsha, mundaı pýnktter óte paıdaly. Meniń jumyspen qamtý ortalyǵyna barýym ekitalaı edi. Al búgin joldamaǵa ıe bolyp, jumys usynýshylardyń baılanys nómirlerin ózime jazyp aldym. Osynyń barlyǵyn uıymdastyrýshylarǵa degen alǵysym zor, – deıdi qala turǵyny Valerııa Gýdına.
Qaraǵandy qalalyq jumyspen qamtý ortalyǵynyń málimetine saı, búgingi kúnde oblys ortalyǵynda 1800 bos jumys orny bar. Budan bólek, jastar tájirıbesi, áleýmettik jumys oryndary, qoǵamdyq jumystar sııaqty taǵy 500 ýaqytsha jumys orny ashylǵan. Al biregeı joba avtorlary jyljymaly beketterdiń kómegimen qaladaǵy jumyssyzdyqty joıý isinde naqty nátıjelerge qol jetkizýge bolatynyna senimdi.
Qaırat ÁBILDA,
«Egemen Qazaqstan»
Qaraǵandy