Qazaqstan Respýblıkasy Qarýly kúshteriniń ókilderi Túrik Respýblıkasynyń Kars provınsııasynda ótip jatqan «Kysh-2019» birikken kópultty jaýyngerlik oqý-jattyǵýynda tájirıbe almasady.
Oqý-jattyǵýdyń negizgi maqsaty-áskerlerdiń jaýyngerlik daıyndyǵyn jáne bólimshelerdiń otty múmkindikterin baǵalaý, bólimshelerdi úılestirý jáne qysqy jaǵdaılarda materıaldyq-tehnıkalyq qamtamasyz etýdi uıymdastyrý, sondaı-aq qysqy jaǵdaılarda qarý-jaraq pen áskerı tehnıkanyń jańa úlgileriniń jaýyngerlik múmkindikterin synaý bolyp tabylady.
Qazaqstan Qarýly Kúshteriniń bólimsheleri oqý-jattyǵý barysynda eldi mekende jáne taýly jaǵdaılarda áýe desanttaryn qoldana otyryp jalpy áskerı shabýyl operasııasyn júrgizý jáne áskerı avıasııany atys qoldaý boıynsha is-qımyldardy pysyqtaıdy.
Aıta keteıik, «Kysh-2019» birlesken kópultty jaýyngerlik oqý-jattyǵýdyń belsendi kezeńi 21 aqpanda ótedi. Oqý-jattyǵýlarǵa Ázirbaıjan, Bangladesh, Bolgarııa, Bosnııa jáne Gersegovına, Ulybrıtanııa, Grýzııa, Qazaqstan, Katar, Kýveıt, Kosovo, Norvegııa, Italııa, Saýd Arabııasy jáne Túrkııa áskerı qyzmetshileri qatysady.