Qyzylordalyq jastar qystyń qytymyr aıazynda qoǵamdyq oryndar men bazarlarda ózin-ózi jumyspen qamtyǵan eki júzge jýyq adamdy tegin tamaqtandyrdy dep habarlaıdy «Egemen.Kz» tilshisi.
Saýapty isti QMDB-nyń Qyzylorda oblysy boıynsha ókildigine qarasty "Jastar isi" sektory men qalalyq «Sultan» meshitiniń ókilderi uıymdastyrǵan. Jastardyń bul bastamalaryn oblystyq «Jastar resýrstyq ortalyǵy» men qala kásipkerleri de qoldady.
«QMDB-nyń Qyzylorda oblysy boıynsha ókili "Aqmeshit-Syrdarııa" meshitiniń bas ımamy Bolatbek qajy Ábýov bastaǵan jastar búgin ıgi is jasady. Bul shara ótken jyly da meshit qyzmetkerleri uıymdastyrǵan. Bıyl sol shara jalǵasyn tapty. Biraq bul joly kómek alýshylardyń qatary kóbeıdi. Atalǵan qaıyrymdylyq sharasynyń maqsaty halyqtyń júregine jylýlyq syılaý. Jastardy jaqsylyq jasaýǵa baýlý», -deıdi "Jastar isi" sektorynyń úılestirýshisi Serik Ábil.
Qala jastary búginde bireýler kóp aıtatyndaı haıp úshin jasaǵan joq. Az da bolsa qamkóńil jandarǵa septigi tıgenderine qýanýly. Qazaq ejelden meıirban, qonaqjaı halyq. Búgingi jastar ata-baba dástúrine laıyqtyǵyn osylaı dáleldep keledi.
Baqtııar TAIJAN,
«Egemen Qazaqstan»
Qyzylorda oblysy