Beısenbi, 24 mamyr 2012 7:47
Keshe Egıpette prezıdenttik saılaýdyń alǵashqy týry bastaldy. Bul elde saılaý eki kún boıy júrgiziledi. Eger úmitkerlerdiń eshqaısysy saılaýshylar daýysynyń 50 paıyzdan artyǵyn ala almasa, onda ekinshi týr 16-17 maýsymda ótkiziledi. Sóıtip, bılik áskerılerden azamattyq tulǵaǵa ótýi tıis.
Beısenbi, 24 mamyr 2012 7:47
Keshe Egıpette prezıdenttik saılaýdyń alǵashqy týry bastaldy. Bul elde saılaý eki kún boıy júrgiziledi. Eger úmitkerlerdiń eshqaısysy saılaýshylar daýysynyń 50 paıyzdan artyǵyn ala almasa, onda ekinshi týr 16-17 maýsymda ótkiziledi. Sóıtip, bılik áskerılerden azamattyq tulǵaǵa ótýi tıis.
Sarapshylar 13 úmitkerdiń arasynan eki kandıdattyń biriniń ótýi múmkin dep otyr. Olar: «Musylman-baýyrlar» partııasynyń ókili Muhammed Mursı men Arab memleketteri lıgasynyń bas hatshysy Ámir Musa. Sottyń sheshimimen 10 kandıdat dodadan shettetildi. Olardyń ishinde Hosnı Múbáraktiń tusynda syrtqy barlaý qyzmetin basqarǵan Omar Súleımen de bar.
Otyrǵan mınıstr ornyn tabady
Reseıdiń jańa úkimeti tolyq jasaqtalyp, ol burynǵymen salystyrǵanda tórtten úshke jańardy. Biraq burynǵy mınıstrlerdiń kóbi dalada qalmaı, prezıdent V.Pýtın ákimshiligi tarapynan «qamqorlyqqa» alynyp, jańa qyzmetterdiń tutqasyn ustady.
Atap aıtqanda, Tatıana Golıkova, Elvıra Nabıýllına, Andreı Fýrsenko prezıdent V.Pýtınniń kómekshileri, Igor Levıtın keńesshisi qyzmetterine taǵaıyndaldy. Burynǵy ishki ister mınıstri Rashıd Nurǵalıev Qaýipsizdik keńesi hatshysynyń orynbasary oryntaǵyna otyrdy. Buryn bulardyń ishinde Golıkova, Fýrsenko, Levıtınniń basy áńgimege qatty iligip, talaı qaıratkerler olardyń qyzmetterinen ketkenin qalap júrgen bolatyn.
Ártaraptandyrý dep osyny aıt
Túrkimenstan basshylyǵy Úndistan men Pákstanǵa Aýǵanstan arqyly gaz jetkizý kelisim-shartyna qol qoıdy. «Túrkimenstan-Aýǵanstan-Pákstan-Úndistan» dep atalatyn gaz qubyrynyń uzyndyǵy 1700 shaqyrymdy quraıdy. Onyń boıymen kún saıyn 90 mln. tekshe metr gaz aıdalady dep josparlanýda.
Sonyń 14 mln. tekshe metrin – Aýǵanstan, al 38 mln. tekshe metrin Pákstan men Úndistan alatyn bolady. Kelisim-shart boıynsha gaz Pákstanǵa – 2016 jyldan, Úndistanǵa 2018 jyldan bastap jetkiziledi. Qubyr gaz qory 13,1-21,2 trln. tekshe metr dep barlanǵan Galkynysh ken ornynan tartylady. Sóıtip, gazyn buryn Reseı men Qytaıǵa ǵana satyp kelgen el endi saýda aýqymyn osylaısha keńeıtpek.
Radıasııa qalyptaǵydan joǵary emes
Dúnıejúzilik densaýlyq saqtaý uıymynyń (DDU) tekserýlerine qaraǵanda, Japonııadaǵy «Fýkýsıma-1» AES jarylysy aımaǵyndaǵy radıasııanyń qaýpi qalyptaǵydan joǵary emes. Bul týraly uıymnyń osynda jasaǵan baıandamasynda jarııa etildi.
Tek eki jerde ǵana radıasııa qaýpi belgilengen normadan joǵary ekendigi belgili bolyp otyr. Árıne, tekseris AES-tiń ishine jasalǵan joq, ondaǵy radıasııa dozasynyń qaýipti ekendigi sózsiz. Japonııa úkimeti AES-tiń aınalasyndaǵy radıýsy 20 shaqyrym aımaqty 10 jylǵa deıin paıdalanýǵa bolmaıdy dep sheshken jáne elsiz terrıtorııa dep jarııalaǵan. Tekseris osy aýmaqtyń syrtynda júrgizilgen.
Úkimet josparyna jappaı narazylyq
Ispanııada eldegi bes kásipodaqtyń uıymdastyrýymen úkimettiń bilim berý shyǵyndaryn azaıtýyna qarsy osy salanyń qyzmetkerleri men stýdentteriniń joıqyn ereýili bastaldy.
Oǵan bilim berý salasynyń 1 mln.-ǵa jýyq qyzmetkerleri jáne 7,5 mln. stýdent qatysýda. «Bıliktiń bilim berý salasynyń shyǵyndaryn azaıtý áreketinen keıin 100 myń jumys orny qysqarady. Biz buǵan jol bermeımiz», deıdi ereýilge qatysýshylar. Ereýil el astanasymen qatar, birneshe iri qalalarda ótedi.
Barlaýshy ushaǵy apatqa ushyrady
Keshe Chehııada Reseıdiń taǵy bir ushaǵy apatqa ushyrap, 23 adam zardap shekti. An-30 dep atalatyn bul ushaq barlaýshylyq maqsatpen NATO elderi aspanynda ekijaqty kelisim-shartqa sáıkes ushyp júrgen bolatyn. Onyń bortynda 14 reseılik jáne 9 cheh ofıserleri bolǵan.
Aldyn ala málimetterge qaraǵanda, Chaslav qalasyndaǵy áýejaıǵa apatty jaǵdaıda qoný kezinde ushaqtyń aldyńǵy shassıi ashylmaı qalyp, ol jer súzgen. Sonyń kesirinen shyqqan ottan ushaq órtengen. Qazir 19 adamnyń jaǵdaıy óte aýyr dep baǵalanýda. Aıta ketetin jáıt, kelisim-shartqa sáıkes NATO ushaqtary da Reseıdiń aspanynda ushý quqyna ıe.
Qysqa qaıyryp aıtqanda:
BUU-nyń Sırııadaǵy halyqaralyq baıqaýshylary keshe tuńǵysh ret bılik pen oppozısııa arasyndaǵy kelissózge deldaldyq jasady. Nátıjesinde, bıliktiń tankisi oppozısııanyń qolǵa túsken eki belsendisine almastyryldy.
Tájikstan aýmaǵynda О́zbekstan prezıdenti I.Karımovti qaralap jazǵan eki kitap taratylýda. Onda prezıdent pen onyń otbasynyń «qylmystary» áshkerelense kerek. Kitap avtorynyń kim ekeni belgisiz.
AQSh Kongresi bıýdjet basqarmasynyń derekterine qaraǵanda, kelesi jyldyń alǵashqy jartysynda Amerıka ekonomıkasy 1,3 paıyzǵa tómendeıdi.
Nemistiń 16 jastaǵy oqýshysy Shaýrııa Raı Drezdende ótken olımpıadaǵa qatysyp, matematıkanyń eki kúrdeli esebin sheshken. Qazir ǵalymdar ony klassıkalyq mehanıka boıynsha ashylǵan jańalyqqa balap otyr.
Keshe Reseıdiń Plesesk ǵarysh aılaǵynda qatty otyndy jańa qurylyqaralyq ballıstıkalyq zymyran ushyryldy. Byltyrǵy qyrkúıek aıynda ushyrylmaq bolǵan osyndaı zymyran apatqa ushyraǵan edi.
Internet materıaldary negizinde ázirlendi.