Prezıdent Qasym-Jomart Toqaev Astana qalasynyń ataýyn jáne elimizdegi oblys ortalyqtarynda Elbasy N.Nazarbaevqa kóshe attaryn berýdi usynǵan edi. El Prezıdenti bul usynysyn QR Parlamentiniń qos palatasy jáne QR Úkimeti músheleri aldynda sóılegen sózinde aıtty.
Osyǵan oraı búgin altynshy shaqyrylymdaǵy Shymkent qalasy máslıhatynyń kezekten tys qyryq altynshy sessııasynda qala depýtattarynyń qoldaýymen Shymkent qalasyndaǵy Astana dańǵylyna Nursultan Nazarbaev esimi berildi. Kezekten tys uıymdastyrylǵan jıynǵa qala ákimi jáne máslıhat hatshysy, ákimdik músheleri, jergilikti atqarýshy organ basshylary qatysyp, barlyǵy bul sheshimdi qoldady.
«Elbasynyń ómir joly óskeleń urpaqqa úlgi. Biz Nursultan Əbishulynyń basshylyǵymen alǵash ret tól teńgemizdi ustaǵanymyzdy, Eltańbamyzǵa súısingenimizdi eshqashan umytpaımyz! Dəl osy kezeńde qazaqtyń alǵashqy sportshylary Olımpıadada jeńis tuǵyrynyń bıigine shyǵyp, kók Týymyzdy jelbiretip, búkil əlemge Qazaqstan Respýblıkasynyń Ənuranyn tyńdatty. Qanshama aýyl-aýdandar qazaqsha ataýyn qaıta aldy. Tipti, «Alma-ata» Almaty bolyp, «Chımkenttiń» tarıhı Shymkent aty qaıta jańǵyrdy. Qazaq tiliniń mərtebesi asty. Bir ǵana Shymkent shaharynda júzdegen kópqabatty turǵyn úı salyndy. Jańa mektepter men aýrýhana, emhanalardyń səýleti qandaı tartymdy?! Astana! Esildiń jaǵasyndaǵy bos jatqan dalany əsem qalaǵa aınaldyrýdyń orasan zor eńbek ekenin búkil əlem moıyndady. El eńsesin kóteretin səýletti ǵımarattardyń sany kóbeıdi. Təýelsiz eldiń irgesin bekitip, buǵanasyn qataıtty» dedi Shymkent qalasy máslıhatynyń hatshysy Ǵanı Tashqaraev.
Esterińizge salar bolsaq, Astana dańǵyly – Shymkent qalasynyń bas kóshesi. Onda qalanyń ákimshilik-iskerlik ortalyǵy ornalasqan.
Nurshat TО́KEN,
«Egemen Qazaqstan»
Shymkent