Almatyda aýqymdy ınfraqurylymdyq joba – halyqaralyq áýejaıdy jańǵyrtý jumystary qarqyn alǵandyqtan ótkizý qabileti artyp, servıstik deńgeıi jańa satyǵa kóteriledi. Horizon jobasy sheńberinde júzege asyp jatqan bul bastama áýejaıdyń kelbetin túbegeıli ózgertedi, dep jazady Egemen.kz.
Almaty qalasy ákiminiń orynbasary Oljas Smaǵulovtyń málimetinshe, joba 2050 jylǵa deıingi uzaqmerzimdi josparǵa negizdelgen. Sonyń nátıjesinde termınaldar jańǵyrtylyp, jolaýshylarǵa qyzmet kórsetý sapasy aıtarlyqtaı jaqsarady.
Bılet bar, oryn joq: Overbýkıng kezinde jolaýshy neni bilýi tıis?
Jobanyń negizgi baǵyttarynyń biri – ishki reıster termınalynyń ótkizý qabiletin arttyrý. Qazirgi 3 mln jolaýshydan 7 mln jolaýshyǵa deıin ulǵaıtý josparlanǵan, ıaǵnı kórsetkish eki eseden asa ósedi. Sonymen qatar, 1500 oryndyq jabyq kópdeńgeıli avtoturaq salynyp, taksı aımaǵy retke keltirilip, irgeles aýmaq abattandyrylyp jatyr.
Búginde jumystar 2028 jylǵa deıin jalǵasatyn birinshi kezeń sheńberinde júrgizilýde. Jobanyń jalpy ınvestısııa kólemi 362 mln dollardy quraıdy.
Ákim orynbasarynyń aıtýynsha, qazirdiń ózinde birqatar mańyzdy ózgeris engizilgen. Termınal aımaqtary jańartylyp, termınal men avtoturaqty jalǵaıtyn jaıaý júrginshiler ótkeli salyndy, ishki CIP-termınal iske qosylyp, áýejaı mańy kórkeıtildi. Bul jolaýshylar úshin qolaılylyq deńgeıin edáýir arttyrdy.
Al birinshi kezeń sheńberinde júzege asatyn negizgi jumystardyń biri – ishki reıster termınalyn tolyq jańǵyrtý. Bul jumys 2026 jylǵy 11 shildede aıaqtalady dep josparlanǵan. Sonymen qatar, júk qabyldaý jáne suryptaý júıesiniń múmkindigi eki esege artady, ushaqtardyń qozǵalysyna arnalǵan jańa jolaqtar salynyp, zamanaýı muzǵa qarsy óńdeý alańy iske qosylady.
Almaty áýejaıy zamanaýı habqa aınalady
Budan bólek, áýe kemelerine qyzmet kórsetý ınfraqurylymy jańartylyp, óndiristik, qoımalyq jáne ákimshilik nysandar salynyp jatyr. Bul áýejaıdyń halyqaralyq standarttarǵa saı jumys isteýine múmkindik beredi.
Áýejaı mańyndaǵy qyzmet kórsetý júıesi de kezeń-kezeńimen damıdy. 2027-2028 jyldary tranzıttik jolaýshylar men ekıpajdarǵa arnalǵan jańa qonaq úı keshenin salý josparlanǵan. Sonymen qatar, kólik jáne avtoturaq ınfraqurylymy jetildiriledi.
Jańa jobalardyń biri – kópdeńgeıli avtoturaq, onyń nátıjesinde turaq oryndarynyń jalpy sany 2275-ke deıin jetedi. Bul jolaýshylar úshin qaýipsizdik pen qolaılylyqty arttyrady.
Avıasııalyq ınfraqurylymmen qatar, qalada sıfrlyq jobalar da iske asyrylyp jatyr. Sonyń ishinde «Alataý» ınnovasııalyq tehnologııalar parkinde zamanaýı derekterdi óńdeý ortalyǵy salynady. Bul nysan halyqaralyq standarttarǵa saı bolyp, 480 serverlik tirek ornatýǵa jáne 130 jańa jumys ornyn ashýǵa múmkindik beredi.
Almaty áýejaıynda 6,8 mlrd teńge somasynda zańbuzýshylyqtar anyqtaldy
Jalpy, jańǵyrtý jumystarynyń basty maqsaty – ótkizý qabiletin arttyrý, qaýipsizdikti kúsheıtý jáne qyzmet kórsetý sapasyn jaqsartý. Osylaısha, Almaty áýejaıyn kezeń-kezeńimen halyqaralyq deńgeıdegi iri avıasııalyq habqa aınaldyrý kózdelip otyr.