Memleket basshysy Qasym-Jomart Toqaevtyń atyna Qazaqstan Respýblıkasynyń Prezıdenti laýazymyna kirisýine oraı memleketter basshylary men halyqaralyq uıymdardyń jetekshilerinen quttyqtaý jedelhattary men hattar kelip tústi. Bul týraly Aqordanyń baspasóz qyzmeti xabarlady.
Reseı Federasııasynyń Prezıdenti Vladımır Pýtın óz quttyqtaýynda Qasym-Jomart Toqaevtyń eki memleket arasyndaǵy strategııalyq seriktestik pen odaqtastyq qatynastardy nyǵaıtý, sondaı-aq Eýrazııa keńistigindegi ózara tıimdi ıntegrasııalyq úderisterdi ilgeriletý isine zor eńbek sińirgenin atap ótken.
«Biz Qazaqstan men Reseıdiń barlyq saladaǵy syndarly yntymaqtastyǵyn odan ári ilgeriletýdi, sondaı-aq kún tártibindegi halyqaralyq ózekti máselelerdi sheshý jolynda ózara yqpaldastyqty birlese qamtamasyz etemiz dep senemin. Munyń baýyrlas halyqtardyń múddelerine saı keletini, óńirlik turaqtylyq pen qaýipsizdikti nyǵaıtýdy kózdeıtini sózsiz», – delingen jedelhatta.
Qytaı Halyq Respýblıkasynyń Tóraǵasy Sı Szınpın quttyqtaý hatynda Qazaqstan men Qytaıdyń tatý kórshi ári jan-jaqty strategııalyq seriktes ekenine toqtalyp, eki eldiń kúsh jumyldyrýynyń arqasynda qarym-qatynastarymyz joǵary deńgeıge kóterilgenin atap ótken.
«Biz Tuńǵysh Prezıdent Nursultan Nazarbaev ekeýimiz berik dostyq qatynastar ornattyq. Sondaı-aq, Sizben birge de eki memlekettiń jáne halqymyzdyń ıgiligi úshin Qazaqstan men Qytaı arasyndaǵy jan-jaqty strategııalyq seriktestik qatynastardy nyǵaıta túsemiz dep senemin. Dostas Qazaqstannyń qýaty artyp, órkendeı berýine nıettestik bildiremin, sonymen qatar halqyńyzǵa baq-bereke men amandyq tileımin», – delingen quttyqtaý hatta.
О́zbekstan Respýblıkasynyń Prezıdenti Shavkat Mırzıeıov óziniń jedelhatynda Qazaqstan Respýblıkasynyń Tuńǵysh Prezıdenti Nursultan Nazarbaevtyń tarıhı róli asa zor ekenin atap ótip, ózbek jáne qazaq halyqtaryn dostyq pen tatý kórshiliktiń san ǵasyrlyq arqaýy baılanystyratynyn jetkizgen. Sondaı-aq, hatta tyǵyz yqpaldastyq pen ózara senimniń mol tájirıbesi eki jaqty qarym-qatynasty strategııalyq seriktestiktiń jańa sapaly deńgeıine shyǵarýǵa múmkindik bergeni aıtylǵan.
«Biz birlese kúsh jumyldyrýdyń arqasynda óńirdegi qaýipsizdikti, turaqtylyq pen ornyqty damý úderisin qamtamasyz etý úshin elderimiz ben halyqtarymyz arasyndaǵy kóp jaqty yntymaqtastyqtyń zor áleýetin tolyq paıdalana otyryp, qol jetkizilgen ýaǵdalastyqtardy dáıekti túrde júzege asyra beretinimizge kámil senemin», – delingen jedelhatta.
Qyrǵyz Respýblıkasynyń Prezıdenti Sooronbaı Jeenbekov quttyqtaý jedelhatynda eki el arasyndaǵy strategııalyq seriktestik, dostyq, odaqtastyq jáne tatý kórshilik qatynastar halyqtarymyzdyń ıgiligi men órkendeýi úshin odan ári nyǵaıa beretinin atap ótken.
Tájikstan Respýblıkasynyń Prezıdenti Emomalı Rahmonnyń jedelhatynda Tájikstan men Qazaqstannyń strategııalyq seriktestikke negizdelgen búkil qatynastary dostas halyqtardyń ıgiligi jolynda nyǵaıa túsetinine senim bildirilgen.
Túrikmenstan Prezıdenti Gýrbangýly Berdimuhamedov óziniń quttyqtaý jedelhatynda Túrikmenstanda Qazaqstanmen aradaǵy dostyq, ózara qurmet pen kómek qaǵıdattary negizinde qalyptasqan qatynastar joǵary baǵalanatynyn atap ótken.
«Túrikmenstan men Qazaqstan arasyndaǵy qatynastar aldaǵy ýaqytta da baýyrlas halyqtarymyzdyń ıgiligi úshin qarqyndy damyp, ózara tıimdi yntymaqtastyq rýhynda nyǵaıa beredi dep senemin», – delingen jedelhatta.
Sıngapýr Respýblıkasynyń Prezıdenti Halıma Iаkob óziniń jedelhatynda eki memleket arasynda halyqtarymyzdyń ál-aýqatyn arttyrý jáne elderimizdi damytý úshin ortaq maqsattarǵa negizdelgen eki jaqty dostyq qatynastar qalyptasqanyn atap ótken.
«Byltyr 25 jyl tolǵan qarym-qatynastarymyzdyń dáıekti damyp kele jatqanyn zor qýanyshpen atap ótkim keledi. Eki jaqty baılanystardy odan ári nyǵaıtý úshin Sizben birlese jumys isteýdi asyǵa kútemin», – delingen jedelhatta.
Moldova Respýblıkasynyń Prezıdenti Igor Dodon óziniń quttyqtaý jedelhatynda Qasym-Jomart Toqaevtyń joǵary memlekettik laýazymdaǵy qyzmeti Qazaqstandy odan ári órkendetýge jáne Moldova men Qazaqstannyń dostyq baılanystaryn damytýǵa baǵyttalatynyn atap ótken.
Chehııa Respýblıkasynyń Prezıdenti Mılosh Zeman eki eldi dostyq qatynastar men kóptegen baǵyttar boıynsha, ásirese, ekonomıkalyq salada tyǵyz yntymaqtastyq biriktiretinin atap ótip, olardyń aldaǵy ýaqytta tabysty ilgerileı beretinine senim bildirdi.
Serbııa Respýblıkasynyń Prezıdenti Aleksandr Výchıch Serbııa men Qazaqstannyń arasyndaǵy shynaıy dostyq pen qurmetke negizdelgen qatynastar ótken kezeńde múldem jańa deńgeıge kóterilgenin atap ótken.
«Qurmetti Nursultan Nazarbaev myrzamen jeke baılanysym arqyly ornyqqan yntymaqtastyq pen tyǵyz qatynastardy aldaǵy ýaqytta jalǵastyryp qana qoımaı, odan ári nyǵaıta beremiz dep senemin», – delingen jedelhatta.
TMD Atqarýshy komıtetiniń tóraǵasy – atqarýshy hatshy Sergeı Lebedev Qazaqstanda Qasym-Jomart Toqaevtyń basshylyǵymen myqty jáne órkendegen memleket qurý, onyń halyqaralyq arenadaǵy ornyn nyǵaıtý isi jalǵasa beretinine, al Táýelsiz Memleketter Dostastyǵy elderimen ózara tıimdi seriktestik jańa ári zor serpin alatynyna senim bildirgen.
Shanhaı yntymaqtastyq uıymynyń Bas hatshysy Vladımır Norov Qazaqstannyń Tuńǵysh Prezıdenti – Elbasy Nursultan Nazarbaevtyń úlesin atap ótip, táýelsizdik jyldary Qazaqstannyń saıası, áleýmettik-ekonomıkalyq damýdyń kúrdeli mindetterin atqarý isinde aıtarlyqtaı jetistikterge qol jetkizip, halyqaralyq bedelin nyǵaıtqanyn aıtqan.
«Qazaqstannyń Tuńǵysh Prezıdenti N.Á.Nazarbaevtyń halyqaralyq jańashyl bastamalary álemdik qoǵamdastyq tarapynan árdaıym qoldaý tapty. Qazaqstannyń bedeldi ári ádiletti pikirine óńirde de, álemde de qulaq asyp, qurmetpen qaraıdy. Shanhaı yntymaqtastyq uıymynyń Bishkek qalasynda Sizdiń qatysýyńyzben ótetin aldaǵy sammıti «Shanhaı rýhy» atty jasampazdyq qaǵıdatyna súıene otyryp, óńirlik jáne jahandyq qaýipsizdik máselelerin júzege asyrý úshin birlesken kúsh-jigerdi jandandyra túsýge múmkindik beredi dep senemin», – delingen jedelhatta.
BUU-nyń Jenevadaǵy bólimshesiniń Bas dırektory Mıhael Meller óziniń hatynda Qazaqstan Prezıdentiniń memlekettik qyzmettegi jáne BUU aıasyndaǵy tájirıbesin atap ótken. Munyń Qazaqstan úshin biregeı basymdyq ekeni jáne onyń Ortalyq Azııadaǵy ıntegrasııalyq jáne yntymaqtastyq úderisterde jetekshi ról atqarýǵa septigi tıetini aıtylǵan.
«Men osyndaı mártebeli laýazymǵa ózimniń tileýlesim – kóp jaqty dıplomatııany ustanýshy tulǵanyń kelgenine qýanyshtymyn. BUU men Qazaqstan arasyndaǵy otyz jylǵa jýyq ýaqyt ishinde qalyptasqan osyndaı ózara túsinistik rýhymen ortaq syn-qaterlerge tótep berý úshin birlese jumys isteýge daıynmyn», – delingen quttyqtaý hatta.
Eýrazııa ekonomıkalyq komıssııasy alqasynyń tóraǵasy Tıgran Sarkısıan Qasym-Jomart Toqaevtyń Qazaqstan Prezıdenti laýazymyndaǵy qyzmeti Eýrazııa ekonomıkalyq odaǵyndaǵy ıntegrasııalyq úderisterdi jan-jaqty damytýǵa jáne onyń halyqtarynyń baq-berekesin arttyrýǵa baǵyttalatynyna senim bildirgen.