Sh.Aımanov atyndaǵy mektep-ınternatta bıologııa pániniń muǵalimi Qarlyǵash Smaǵulovanyń bastamasymen «Mektep jylyjaıy» áleýmettik jobasy júzege asyrylýda.
Qııar, qyzanaqtardy ósirip, baptaý úshin ızraıldik tamshylatyp sýarý ádisi qoldanylady.
Bul tásil arqyly bir saǵattyń ishinde ósimdiktiń tamyryna eki lıtrdeı sý barady, ári sýdy únemdeýge múmkindik beredi.
Sondaı-aq, kókónisterdi tyńaıtyp, óńdeý jumystary júrgiziledi. Kúndelikti jylylyq mólsherin, jaryq jetkiliktiligin anyqtap, kóshetterdiń aram shópterin julyp, sýarý, qopsytý, sıretý jumystary jasalýda.
Mektep dırektorynyń aıtýynsha, jylyjaı kesheninde oqýshylar agronomııa negizder teorııasyn tájirıbe júzinde ushtastaryp, kókónis jáne gúl daqyldaryn ósirýdi úırenedi. Ekinshiden, bul - bolashaq mamandyqqa degen baǵyt- baǵdar.
- Bıylǵy aqpan aıy boıy ózimiz ósirgen «Mırında» surypty qııarymyzdy jınap aldyq. Mysaly, aqpannyń 13-i kúni 2,5 keli, 14-de 4,5 keli, 16-da 2 keliden dep ár kúni qansha keli jınaǵanymyzdy jazyp otyrdyq. Qazir qyzanaqtar gúldep, kishkentaı jasyl túıinderi shyǵyp keledi. Qyzanaqty mamyr aıyna deıin jınaımyz, deıdi Qarlyǵash Smaǵulova.
Jylyjaıda mekteptiń bıologııa, agronomııa, tehnologııa pániniń muǵalimderi, tehnıkalyq qyzmetkerleri jumys jasaıdy.
Farıda BYQAI,
«Egemen Qazaqstan»
Pavlodar oblysy, Baıanaýyl aýdany