Osy semınarda aıtylǵandaı, elimizdiń aýyl sharýashylyǵynda qoldanylatyn ádis-tásilder jańa tehnologııalardyń kómegimen kúsheıe túspek. Mysaly, ósimdik sharýashylyǵyndaǵy dálme-dál eginshilik – osy saladaǵy sharýashylyqtar ıgerýge tıis mańyzdy tásilderdiń biri. Semınarǵa arnaıy Aqmola, Qaraǵandy, Soltústik Qazaqstan oblystarynan AО́K bıznes ókilderiniń kelý sebebi de osy. Olar elordadaǵy Qazaq agrotehnıkalyq ýnıversıteti qabyrǵasynda zertteýmen shuǵyldanatyn ǵalymdardyń dárisine qatysyp, ortaq máselelerdi talqylaýǵa múmkindik aldy. Bilikti de bilimdi dáriskerler fermerlerge, bıznesmenderge tyń tehnologııalardyń, jańa ıdeıalardyń jaı-japsaryn, jańa tehnıkalardyń artyqshylyqtaryn aıtyp, jumys ónimdiligin arttyrýdyń joldaryn kórsetti.
– Bul semınardan alqaptarda kezdesetin aýrýlardyń aldyn alý jáne zııankestermen kúres ádisteri, daqyldardyń ónimdiligin arttyrý tásilderi, jaıylymdardyń elektrondyq kartasyn jasaý degen sekildi jańa aqparattar alyp jatyrmyz. Osynyń arqasynda sharýashylyǵymyzdy damytý úshin bilimimizdi jetildirgimiz keldi. Keıin jumysymyzǵa septigin tıgizedi dep oılaımyn, – deıdi Atbasar aýdanynan kelgen «Bastaý» JShS agranomy Shuǵalov Sátbaı.
Buǵan deıin mundaı semınar Qaraǵandy, Qostanaı, Aqtóbe, Petropavl sekildi taǵy basqa qalalarda ótkizildi. Ár uıymdastyrylǵan sabaqtar ózektiligimen erekshelenedi. О́ıtkeni alqaptardy kartografııalaý negizderin oqytý, agroqurylymdar monıtorınginde geoaqparattyq júıelerdi paıdalaný sekildi tyń tásilder aýyl sharýashylyǵyn órkendetý isinde asa qajet. Agrotehnıkalyq ýnıversıtetiniń oqytýshylary bul tásilderdi synaqtan ótkizip te júr.
– Byltyr biz dron paıdalanǵanbyz. Eń aldymen ǵaryshtan alynǵan fotolar arqyly egis alańyn anyqtap, jaǵdaıyn tekserdik. Belgili bir jerde qandaı ózgeris bolyp jatqanyn, tipti qandaı aram shóp ósip, qandaı zııankester egistikke zaqym keltirip jatqanyna deıin bilý úshin ushqyshsyz dronnyń kómegine súıendik. Dronnyń bir jaqsysy – qalaǵan bıikten bastap, bir metr tómendetip te qaraýǵa bolady. Mysaly, 500 ga egis alańyn bir zertteýshi 5-6 saǵatta zerttep shyǵa alady. Ol sharýashylyqta 10 000 - 15 000 ga jer bolatyn bolsa, onda eki aı ýaqyt arnaýǵa týra keledi. Men aıtyp otyrǵan qurylǵylardy paıdalansańyz 500 ga jerdi 10-15 mınýttyń ishinde zertteı alasyz. Sol sekildi eki-úsh kúnniń ishinde 15 000 ga aýmaqty baqylaý qıyn emes. Naqty eginshilik úshin munyń mańyzy orasan, - deıdi «О́simdik qorǵaý jáne karantın» kafedrasynyń oqytýshysy Sadyqov Bekmyrza.
Fotolardy túsirgen avtor.