О́ziniń eńbek jolyn Sultanbek Mákejanov 1983 jyly jol sheberi bolyp bastady, keıin ınjener-geodezıst, qurylys ýchaskesiniń sheberi boldy. 1985-1990 jyldar aralyǵynda Almaty qalasyndaǵy Qazaqstannyń LKJO-nyń aýdandyq, qalalyq komıtetterinde basshylyq qyzmetterde boldy. 1990-2002 jyldar aralyǵynda jeke sektorda jumys jasady. «Astana Holdıng Bank» tóraǵasynyń orynbasary, «Kazahınvest» korporasııasynyń vıse-prezıdenti boldy.
Memlekettik basqarý organdarynda mol tájirıbe jınaqtady. Mańǵystaý oblysy ákimi apparatynyń basshysy, ákimniń orynbasary qyzmetterin atqardy. 2005 jyldan bastap Almaty qalasynda eńbek etýde. Qala ákimi apparaty basshysynyń orynbasary, Tabıǵı resýrstar jáne tabıǵatty paıdalanýdy retteý basqarmasynyń basshysy, Medeý aýdanynyń ákimi boldy.
2016 jyldyń mamyrynan Almaty qalasy ákiminiń orynbasary qyzmetin atqardy.
Almaty ákimi Baýyrjan Baıbek aýdan aktıvimen jıyn barysynda jańa ákimniń aldyna birqatar mańyzdy mindetter qoıdy.
Medeý aýdany qalanyń ǵylym, bilim jáne mádenı ortalyǵy bolyp tabylady. Munda Qazaqstannyń ǵylym Akademııasy, Respýblıka Saraıy, Memlekettik Ortalyq mýzeı, iri parkter, kınoteatrlar, qala turǵyndary men týrıster tynyǵatyn kórneki oryndar ornalasqan. Osyǵan oraı aýdan ákimi eń aldymen abattandyrýǵa, jasyldandyrýǵa, ortalyq kóshelerdegi, parkterdegi, alańdardaǵy tazalyqqa, nysandardyń arhıtektýralyq kelbetterine birinshi kezekte nazar aýdarǵany jón. Aıta keterligi, bıylǵy jyly aýdanda 7 parkter men skverler salý, 100 aýlaǵa jóndeý júrgizý, Dostyq dańǵyly men Áıteke bı kóshesin modernızasııalaý josparlanǵan.
Degenmen, aýdanda ortalyqtandyrylǵan sý qubyry men kárizge qosylmaǵan turǵyn úıler áli de bar. Olar Kamenskoe platodaǵy turǵyn kesheni (1500 úı), Baıqońyr kóshesi (kópqabatty 11 turǵyn úı), Býtakovka yqsham aýdany (250 úı) bulardaǵy 8 myńǵa jýyq adam ortalyq júıelerge qosylmaǵan. Aýdan ákimi qalalyq Energotıimdilik jáne ınfraqurylymdyq damý basqarmasymen birge osy turǵyn keshenderine sý jáne káriz jelilerin tartý máselesin sheshý sharalaryn qarastyrǵandary jón. Dýman yqsham aýdanynyń 30 myńǵa jýyq turǵyny bar, bıyl munda ınjenerlik jelilerdi tartý jumysy aıaqtalǵanymen, asfalt tóselmeı qalǵan. Aýdan ákimi qalalyq Mobıldilik basqarmasymen birge 23 km jol men km trotýardy qalpyna keltirýi tıis.
Bulardan ózge, aýdan ákimi Bilim basqarmasymen birge MJÁ aıasynda kásipkerlerdi mektepter salý isine keńinen tartýy tıis.
Jalpy, sońǵy úsh jyl ishinde Medeý aýdanynda kóterme saýdadaǵy taýar aınalymy 50%-ǵa, negizgi kapıtalǵa ınvestısııa 49%-ǵa, salyq túsimderi 36%-ǵa artty. Nazarbaev, Abaı, Dostyq dańǵyldary, Gogol, Qabanbaı batyr kósheleri, «Abaı» alańy, Ortalyq mádenıet jáne demalys parki jańǵyrdy. Haıýanattar parkin jóndeý aıaqtalyp qaldy. 50-den astam jeke bala baqshalar, mını-ortalyqtar ashyldy, sonyń arqasynda aýdanda bala baqsha kezegi 35%-ǵa qysqardy. Aýlalardyń 80%-y nemese 400 aýla jańardy.