Jobanyń avtory ári bas prodıýseri Álııa Nazarbaeva, uıymdastyrýshysy «Jandaný álemi» men Tuńǵysh Prezıdent Qorlary bolyp sanalatyn elimizdegi eń aýqymdy balalar án baıqaýynda qazylar alqasy jas daryndarǵa túrli baǵyttaǵy ánderdi aıtqyzyp, daýysy men vokaldyq qabiletterin synady. Qazylar alqasynyń quramyndaǵy mýzykalyq prodıýser Farıda Nııazova jáne tanymal qazaqstandyq oryndaýshy Baljan Bıdash kıeli ólkeniń jas daryndar arasynan úzdik daýys ıesin anyqtaýda kásibı pikirlerin bildirdi. Sóıtip Tólebı aýdanynyń ortalyǵy Leńgirdiń kishkentaı turǵyny Meırambek Shalxarbaı baıqaýdyń aqtyq kezeńine joldama aldy. Jobanyń tálimgeri Baljan Bıdashtyń aıtýynsha, 11 jastaǵy Meırambek syńǵyrlaǵan daýysymen, mýzykany minsiz uǵyný qabiletimen tańǵaldyrǵan. Onyń erekshe ártistik qabileti de kópshilikti súısindirdi. Jobanyń aqtyq kezeńinde Túrkistan oblysynyń atynan óner kórsetetin Meırambek endi kúzde elimizdiń basqa aımaqtarynyń jeńimpazdarymen «Juldyzdy Arman úıinde» kezdesedi.
«Bala daýysy» baıqaýynyń uıymdastyrýshysy Tolǵanaı Hasenniń aıtýynsha, sýperfınalǵa daıyndalý maqsatynda balalar vokal, horeografııa jáne ártistik qabiletterin arttyratyn sabaqtarǵa qatysady. Al 25-27 qazan kúnderi jobanyń aqtyq baǵdarlamalarynda óner kórsetip, baıqaýǵa arnaıy jazylǵan ánderdi oryndaıdy. Iаǵnı, árbir balaǵa avtorlyq án jazylady. Baıqaýdyń sońynda 17 fınalıstiń qatysýymen konsert, mıýzıkl ótkiziledi. Al «Bala daýysy-2019» baıqaýynyń jeńimpazy mýzykalyq oqý ornynda bilim alýǵa múmkindik beretin grant pen sıqyrly Dısneılendke saıahat joldamasyn utyp alady.
Túrkistan oblysy