Árıne, armııa tártibi qatal. Qatal bolatyn sebebi, onyń mindeti eldik isti talap etedi. Áskerı qyzmetshi osy mindeti úshin jaýap beredi. Sondyqtan bul mindet kóp adamǵa atqara almas aýyrlyq júkteıtin sekildi kórinedi. Alaıda osynyń ózi kez kelgen jasóspirimdi naǵyz adam bolýǵa baýlaıtyny, shyńdaıtyny eskerile bermeıdi. Jylyna eki ret Qarýly Kúshterdiń jas tolymy áskerı ant beredi. Máselen, byltyr kóktemde Qurlyq áskerleri men Áýe qorǵanysy kúshteriniń áskerı bólimderi men quramalaryna shaqyrylǵan tórt myńnan astam merzimdi qyzmettegi áskerı qyzmetshi Otanǵa adal bolýǵa ant berdi. Osyndaı ant qabyldaǵan soń olar kishi mamandardy daıarlaý baǵdarlamasy boıynsha jaýyngerlik oqýǵa kirisedi. Jarty jyldan soń artıllerıst, tankıst, baılanysshy, atqysh sııaqty áskerı mamandyqtarǵa ıe bolyp, biryńǵaı, tolyqqandy Otan qorǵaýshy sapyna turady. О́tken jyly kúzde Qarýly Kúshterdiń, basqa áskerleri men áskerı quramalarynyń qataryna 17 myńnan astam shaqyrý jasyndaǵy azamat keldi.
Armııamyz aıbyndy degen atyna zaty saı bolýy úshin onyń daıyndyǵy da joǵary bolýy kerek. Bul maqsatta áskerı jattyǵýlar únemi júrgizilip otyrady. Sonyń ishinde qaı kezde bolmasyn desantshylar áskerdiń basty qýaty ekeni belgili. Desanttyq-shabýyldaý áskerlerinde olardyń ózine tán daıarlyǵynyń negizi – áýe-desanttyq daıyndyq boıynsha sabaqtar. Oqý-jattyǵý, sekirýlerin kóptegen áskerı qyzmetshi oryndaıdy. Barlyq jerústi elementterdi «úzdik» degen baǵaǵa oryndaǵan jáne ózderiniń is-qımyldarynyń oryndalýyn jetik meńgergen kýrsanttar ǵana sekirýge ruqsat alady. Osyndaı áskerı ónerdiń shyńdaýy arqasynda armııadaǵy kóptegen jas azamat ómirden óz jolyn tapty. Máselen, ótkende Qapshaǵaıda Desanttyq-shabýyldaý áskerleriniń qazaq kúresinen chempıonaty óz máresine jetti. Onda 80 keliden asa salmaq dárejesinde 30-dan asa palýan tartysqa tústi. Saıys qorytyndysy boıynsha 61993 áskerı bóliminiń áskerı qyzmetshisi aǵa serjant M.Qojantaev jeńimpaz atandy. Ekinshi oryn 32363 áskerı bóliminen kelgen merzimdi qyzmettegi sarbaz E.Sirgebaıǵa buıyrsa, úshinshi oryndy 61993 áskerı bóliminiń aǵa serjanty N.Saıabaev enshiledi. Al Nemistiń Gambýrg qalasynda taekvondodan (WT) ótken «Germany Open-2019» reıtıngtik týrnırinde armııa sportshysy Nursultan Mamaev 74 kelige deıingi salmaq dárejesinde úshinshi oryndy ıelendi.
Ánshilerimizdiń de, sportshylarymyzdyń da deni áskerde qyzmet etkenin aıtqan jón jáne qaısybiri áli de áskerı qyzmetterin jalǵastyrýda. Mysaly, belgili prodıýser Q.Bolmanov arnaıy áskerı batalonda ozat qyzmet etken. Al olımpıada chempıony D.Balandın da «Dınamo» sport qoǵamynda áskerı qyzmetin ótkizgen. Aýyr atlet Nıdjat Rahımov ta osy «Dınamo» sport qoǵamynan shyqqan. Belgili hokkeıshi Damır Ryspaev Almaty qalasyndaǵy Ortalyq sport klýbynda áskerı qyzmetin ótegen. Belgili estrada ánshisi Búrkit Respýblıkalyq ulanda qyzmet etti. Aıta berse, mundaı mysaldardy kóptep keltirýge bolady. Sonda osyndaı belgili adamdardyń kópshiligi armııa olarǵa úlken serpilis bergenin aıtady.
О́ıtkeni mektep, joǵary oqý oryndary keıde bere almaǵan tártip, qaısarlyq, tózimdilik, senimdilik sekildi ómirde asa qajet qasıetterdiń ornyn armııa toltyrady. Talaı áljýaz bozbalanyń armııaǵa baryp kelgennen keıin naǵyz azamat bolyp qalyptasyp ketetini jasyryn emes. Al armııanyń ózine qalaǵan salasyn tańdap, sonda qyzmet etem dep talpynǵan jas eń áýeli óz densaýlyǵyn kútip ustaıtyndyǵy belgili. Máselen, prezıdenttik polk qatarynda eń úzdik áskerı qyzmetshiler ǵana mindetin atqarady. Sebebi Memlekettik kúzet qyzmeti elimizdiń ulttyq qaýipsizdigin qamtamasyz etý kúshterine jatatyn bolǵandyqtan munda irikteý óte qatań júrgiziledi. Osy oraıda aldymen MKQ qyzmetkerleri bul baǵyttaǵy jumysty jyl saıyn jetildirý ústinde. Máselen, byltyr áskerge shaqyrtý komıssııasynyń jumys nátıjesinde 295 jas sarbazdyń 255-i arnaýly orta jáne joǵary bilim alǵan eken. Salystyrmaly túrde aıtsaq, 2016 jyly laıyqty bilimi bar úmitkerlerdiń sany 195-ti quraǵan bolatyn. Bul degenimiz – áskerı qyzmetti sapaly ótkerýge ári qyzmet satysymen joǵarylaýdaǵy óte mańyzdy faktor.
Azamattyq qyzmetke turarda da áskerı boryshyn ótegen jasqa jol beriledi. Onyń ústine burynǵydaı emes, qazirgi kúni áskerde kelisimshartpen qyzmet etý úrdiske aınaldy. Ol úshin áskerı qyzmetshige jalaqy tólenedi. Pátermen de qamtamasyz etiledi. Ásker isinde osyndaı zor nátıjelerge jetip jatqan olardyń otbasyn baspanamen qamtamasyz etý de dástúrli jolǵa qoıylǵan. Máselen, ótken jyly Semeı qalasynyń «Iýnost» shaǵynaýdanynda «Shyǵys» óńirlik qolbasshylyǵynyń áskerı qyzmetshilerine qyzmettik páter kiltterin saltanatty túrde tapsyrý rásimi ótti. «Búgin biz sý jańa páterdiń kiltin aldyq jáne meniń qýanyshym sheksiz. Meniń oıymsha áskerı qyzmet ótkerý úshin bul keremet yńǵaılylyq pen múmkindik beredi. Bólmeler keń, jaryq, páterde barlyǵy daıyn. Jıhaz ben jeke zattarymyzdy alyp kirý ǵana qaldy», dep 44736 áskerı bóliminiń komandıri maıor Dýman Bilálov óz qýanyshymen bólisti. Áskerı qyzmetshilerdi áleýmettik qorǵaý máselesi QR QK Joǵarǵy Bas Qolbasshysy jáne QR Qorǵanys mınıstriniń udaıy baqylaýynda tur.