Bul týraly jýyrda kópbalaly analarmen kezdesýde elordalyq Jumyspen qamtý jáne áleýmettik qorǵaý basqarmasynyń basshysy Sáýle Nurǵojına málimdedi.
Kezdesýge sondaı-aq, qalalyq kásipkerler palatasy Adamı kapıtaldy damytý bóliminiń bastyǵy Janar Tórebekova, bıznesti qarjylaı emes qoldaý bóliminiń sarapshysy Danııar Montaev, qalalyq jumyspen qamtý ortalyǵy dırektorynyń orynbasary Danııar Nurpeıisov, jumyspen qamtý jáne áleýmettik qorǵaý basqarmasynyń bólim basshysy Aıgúl Nurekenova, Investısııalar jáne kásipkerlikti damytý basqarmasy bólim basshysynyń mindetin atqarýshy Ádilet Tilepov qatysty.
Zıýar Jumanova, Aqgúl Turǵanbaeva jáne Nazgúl Baımaǵanbetova 80 kópbalaly analardyń atynan ótinish bildirip otyrǵandyqtaryn aıta kelip, olarǵa jumysqa ornalasý múmkindigin berý týraly usynys aıtty. Aıtýlarynsha, uıymnyń quramyna kirýge nıet bildirgen kóptegen áıelderdiń jasy 40 shamasynda, turmysqa jas kezinde shyqqandyqtan olardyń basym bóliginiń bilimi de, eńbek ótili de joq. Olar «analar men áıelder odaǵyn» qurýǵa nıetti.
Belsendiler kópbalaly áıelder men olardyń balalary bos ýaqytyn paıdaly ótkize alatyn alań ashqysy keledi, sondaı-aq, olar óz qoldarymen daıyndalatyn ónimderdi satýǵa múmkindik alady. Ákimdik bólimsheleriniń mamandary olarǵa kásipkerlik daǵdylaryna oqytýdan bastaý, astanalyq naryqty aldyn ala zerttep, taýarlardyń, jumystar men qyzmetterdiń neǵurlym suranysqa ıe tizbesin anyqtaýǵa keńes berdi.
Kásipkerler palatasynyń ókilderi «Bıznes-bastaý» baǵdarlamasy týraly aıtyp, jańadan bastaǵan bıznesmender qandaı memlekettik qoldaý sharalaryna úmitker bolatynyn egjeı-tegjeıli túsindirip berdi. Olarǵa qoıylatyn basty talap: 1 aıdan 3 aıǵa deıingi merzimge sozylatyn oqýdy jibermeý. Kýrstarda táýekelderdi qalaı esepke alý jáne bazalyq qujattamany qalaı qurý kerektigi egjeı-tegjeıli baıandalady. Tolyq bıznes-jospar ázirlengennen keıin grant alýǵa ótinim berýge bolady.
«Jumys izdep júrgen tulǵalar retinde esepte turǵan qala turǵyndary elordada suranysqa ıe mamandyqtar boıynsha 1 aıdan 3 aıǵa deıin tegin oqý kýrstarynan óte alady: aspaz, kondıter, naýbaıshy, tiginshi, massajıst, elektr, gazben dánekerleýshi, balabaqsha tárbıeshisi, slesar-santehnık, elektromonter, kıberqaýipsizdik mamany, anımasııa jáne vıdeografıka, saýda jónindegi menedjer. Oqýdan keıin qalanyń jeke kompanııalarynda jumysqa ornalasý úlesi óte joǵary», – dep atap ótti Sáýle Nurǵojına.
Elordanyń jumyspen qamtý jáne áleýmettik qorǵaý basqarmasynda kópbalaly analarmen osyndaı kezdesýlerdiń turaqty negizde ótkiziletindigin málimdedi.