Teriskeı óńirdiń tartymdylyǵyn arttyrý kerek

Oqýshylar saraıynda bıýd­jet­tik sala qyzmetkerleriniń qaty­sýymen ótken basqosýda G.Áb­di­qalyqova Elbasy Nursultan Nazarbaev Nur Otan par­tııasynyń HVIII sezinde áleý­mettik salalalardy jandan­dy­rýǵa múmkindik beretin basym baǵyttardy aı­qyn­dap bergenin, halyqtyń kúnkó­risi tómen sanatynyń taby­syn arttyrýǵa, jalaqyny kóte­rýge, turǵyn úı máselesin sheshý­ge, áleýmettik qyzmet sapasyn ny­ǵaı­týǵa erekshe ekpin túsirilgenin atap kórsetti.

Aımaq basshysy Qumar Aqsa­qalov oblysta áleýmettik kómek 6700 balaǵa beriletinin, múgedek bala tárbıelep otyrǵan 2 myńǵa jýyq otbasy, 6764 kóp balaly ana ataýly kómek alatynyn jetkizdi. Oblys ortalyǵynda 535 eski úı súrilip, 2 myńnan astam páter men áleýmettik nysandar turǵyzyldy. Kópbeıindi aýrýhana, dárigerler úshin 200 páterlik turǵyn úı, 2400 oryndyq 3 mektep, stýdentterge arnap 1932 oryndyq 5 jataqhana salynady. Aldaǵy jyldary áleýetti 302 eldi mekende 3 myń baspana boı kóteredi. Kóp balaly analardyń baspanaǵa muqtajdyǵy eskerilip, bıyl 226 páter salynady.

Eńbek jáne halyqty áleý­met­tik qorǵaý mınıstri Berdibek Saparbaev Úkimet tarapynan qabyldanǵan qoldaý sharalaryn keńinen túsindirdi. Eń bas­ty jańalyqtardyń biri, ataýly áleýmettik kómek taǵaıyndalǵan kezde otbasynyń jıyntyq tabysynan kóp balaly otbasylarǵa jáne «Altyn alqa», «Kúmis alqa» tósbelgilerimen marapattalǵan kóp balaly analarǵa beriletin memlekettik járdemaqylar, sondaı-aq múgedektigi boıynsha beriletin járdemaqylar alyp tastalynady.

Bilim jáne ǵylym mınıstri Kúlásh Shámshıdınova tómen jalaqyny esepteýge arnalǵan koef­fısıentterdiń jańa keste­si engizilgenin, bul boıynsha bi­rinshi maýsymnan bastap eńbek­aqyny ala bastaıtynyn jetkizdi. Oqýshylardy bilim berý­diń ja­ńartylǵan júıesimen oqy­tatyn muǵalimderge de úste­meaqy qo­sy­lady. Densaýlyq saq­taý mınıstri Eljan Birtanov 200 myńnan astam medısına qyz­met­kerleriniń jalaqysy óse­tinin, munyń ózi joǵary bilim­di kadr tapshylyǵyn joıýǵa septesetinin alǵa tartsa, Qurylys jáne turǵyn úı-kom­mý­naldyq sha­rýa­shylyq isteri komı­tetiniń tóra­ǵasy Marhabat Jaıymbetov jeńildikti zaemdar arqyly jaıly baspanaǵa ıe bolý, oǵan qatysý quqyqtary men nesıeler berý shart­taryn, aýyldarǵa sapaly tir­shi­lik nárin jetkizý, joldardy qal­pyna keltirý jaıyn alǵa tartty.

Byltyr oblysta 12200 turaq­ty jumys orny paıda boldy. Qabyldanǵan sharalar eńbek na­ryǵyndaǵy turaqtylyqty saqtaýǵa, jumyssyzdyq deńgeıin 4,8 paıyzǵa tómendetýge yqpal etti. Bıyldan bastap 144 myń soltústikqazaqstandyqtyń, onyń ishinde 43 myń bıýdjettik sala qyzmetkeriniń eńbekaqysy molaıdy. Bes áleýmettik bastama aıasynda 719 adam kásipkerlikke tartyldy. 546 adamǵa 130 mıllıon teńgeniń qaıtarymsyz nesıesi bólindi. Keshendi josparǵa sáıkes 2021 jylǵa deıin 14 myń jańa jumys oryndary ashylyp, 300 mıllıard teńgeniń 48 jobasy iske qosylady.

Kırov atyndaǵy zaýytta qala, aýdan ákimderiniń, iri ónerkásip dırektorlarynyń, bıznes, kásip­odaq ókilderiniń qatysýymen ótken jıynda Premer-Mınıs­tr­diń orynbasary qos taraptyq eńbek qatynasyn jandandyrý, áleýmettik máselelerdi basty nazarda ustaý qajettigin aıryqsha atap ótti.

 Ákimdikte ótken jıynda «Máń­gilik el jastary – ındýs­trııaǵa» baǵdarlamasynyń oryndalý jaıy talqylandy. Gúlshara Naý­shaqyzy eńbek kúshi tapshy, de­mografııalyq ahýaly kúrdeli, bala týý kórsetkishi tómen te­riskeı aımaqtarda ishki-syrtqy kóshi-qon úderisi, bilikti maman­dar daıarlaý ózekti ekenin, osy se­bepti elimizdiń ońtústik óńirler­degi jastaryn oqytyp, maman­dyq alǵannan keıin osy jaqta jumysqa ornalastyrýdy dit­teı­tin «Serpin-2050» baǵdarlamasy 2014 jyldan qolǵa alynǵanyn, baǵdarlamaǵa qatysýshylarǵa tolyq jaǵdaı jasalǵanyn aıtty. Búginde bes oblystan kelgen 1,5 myńǵa jýyq serpindik jas oblysta bilimderin jalǵastyrýda.

Úkimet basshysynyń orynbasary tıisti oryndarǵa halyqqa jasalatyn áleýmettik qoldaýdy báseńdetpeýdi júktep, birqatar mindetter belgiledi.

Soltústik Qazaqstan oblysy