Jumys saparynyń maqsaty – óskeleń urpaqty tárbıeleýge, balalardyń qaýipsizdigin qamtamasyz etýge qoǵamnyń nazaryn aýdarý. S.Aıtpaeva sapar barysynda quqyq qorǵaý organdarynyń, bilim berý, densaýlyq saqtaý, áleýmettik qorǵaý, úkimettik emes uıymdarynyń, ata-analar qoǵamdastyǵynyń ókilderimen jáne balalarmen kezdesti.
Ýákil sapar aıasynda ómirde kúrdeli jaǵdaıda júrgen balalardy qoldaý ortalyǵynda, jasóspirimder men balalar úılerinde, devıantty minez-qulyqty balalarǵa arnalǵan arnaýly mekemede, «Qamqor júrek» qoǵamdyq qorynda boldy. Kezdesýler barysynda bala quqyqtaryndaǵy eń jaqsy múddelerdi qamtamasyz etý, jetim balalardyń turǵyn úıge quqyqtary, kámeletke tolmaǵandardyń bos ýaqytyn uıymdastyrý, tárbıe jáne ata-ananyń jaýapkershiligin arttyrý máseleleri talqylandy.
S.Aıtpaeva ata-ana úshin eń dana muǵalim bala ekenin atap ótti. «Shydamdylyq, ustamdylyq, mahabbat pen syılastyqty biz odan úırenýimiz kerek. Paıdaly sabaqty tek bizdiń balamyz ǵana bere alady», – dedi Bala quqyqtary jónindegi ýákil.
Kezdesý barysynda óńirdegi kámeletke tolmaǵandardyń quqyqtaryn qorǵaý jáne qamtamasyz etý, balalar arasyndaǵy quqyq buzýshylyqtyń aldyn alý, densaýlyq saqtaý, sondaı-aq jetim balalardyń quqyqtaryn saqtaý máseleleri talqylandy.
Jumys saparynyń qorytyndysy boıynsha Bala quqyqtary jónindegi ýákil barlyq múddeli organdarǵa, jastar qanatyna ósip kele jatqan urpaqtyń ıgiligi úshin barlyq qajetti sharalardy qoldana otyryp, balalardyń qaýipsizdigin qamtamasyz etý jónindegi áreketterdi úılestirýdi tapsyrdy.